युवालाई देशभित्रै विकास निर्माणमा जुट्न प्रधानमन्त्रीको आग्रह

चितवन– प्रधानमन्त्री पुष्पकमल दाहाल ‘प्रचण्ड’ले आफ्नो सिर्जना र क्षमता राष्ट्रका पक्षमा प्रयोग गर्न युवालाई अपिल गरेका छन्।

शनिबार भरतपुर महानगरपालिकाले अन्तर्राष्ट्रिय युवा दिवस, २०२३ का अवसरमा आयोजना गरेको सप्ताहव्यापी समापन कार्यक्रममा बोल्दै उनले स्वदेश र विदेशमा रहेका लाखौँ युवालाई देशभित्रै विकास निर्माणका कार्यमा जुट्न आग्रह गरे। 

प्रधानमन्त्री दाहालले आउने दिनमा नेपालले कोल्टे फेर्दै जाने र विकासले गति लिने विश्वास व्यक्त गरे। “नेपालमा हर हालतमा सुशासन, बेथिति र भ्रष्टाचारको अन्त्य हुनैपर्छ, तल परेको समुदायलाई माथि ल्याउने कार्यक्रम ल्याउनुपर्छ,” उनले भने, “प्रधानमन्त्रीको हैसियतमा केही दिनदेखि लगातार नै विदेशमा जाने युवा श्रमिकको हकहितको संरक्षण कसरी गर्ने भन्ने विषयमा लागिरहेको छु।”

योगदानमा आधारित सुरक्षा कार्यक्रममा विदेशमा रहेका झन्डै तीन लाख श्रमिक आबद्ध भइसकेको प्रधानमन्त्री दाहालको भनाइ थियो। विदेश जाने युवालाई सुरक्षित र सम्मानजनक कामका अवसरका लागि कसरी वातावरण निर्माण गर्ने भन्ने चुनौती रहेको उनले बताए।

“जबसम्म देशभित्र नै युवाका निम्ति उपयुक्त रोजगारीको वातावरण बन्दैन, तबसम्म युवा पलायनको स्थिति रोकिँदैन,” उनले भने, “प्रधानमन्त्रीको हैसियतले मेरो ध्यान रणनीतिक गृहकार्य गर्दै देशभित्र कसरी ठूला विकासका परियोजना विकास गर्ने भन्नेतर्फ केन्द्रित छ।” 

भारत भ्रमणका क्रममा भारतीय प्रधानमन्त्री नरेन्द्र मोदीसँग आफ्नो गम्भीर कुराकानी भएको उल्लेख गर्दै उनले प्राकृतिक खेती या उत्पादन वृद्धि गर्ने सबै प्रविधिको सदुपयोग र सहकार्य गर्ने बारेमा केही समझदारी बनेको बताए। “नेपालमा मल कारखाना निर्माण गर्नेबारे सैद्धान्तिक सहमति गरेको छु,” उनले भने, “नेपालकोतर्फबाट एउट टोली छिट्टै भारत पठाउँदैछु।”

आफू इटाली जाँदा रोममा बंगलादेशका प्रधानमन्त्रीसँग कुरा हुँदा पनि नेपालको विद्युत् र कृषिका क्षेत्रमा लगानी गर्नसक्ने सम्भावनाबारे कुराकानी भएको प्रधानमन्त्रीको भनाइ छ। आफू छिट्टै चीन भ्रमणमा जान लागेको उल्लेख गर्दै उनले चीन सरकार नेपालमा कृषि, पशुपालनसँगै ठूला आयोजनामा सहयोग गर्ने मनसायमा रहेको बताए।