दर्ता नभएका टिकट बुकिङ काउन्टर हटाउँदै काठमाडौँ महानगर

काठमाडौँ– काठमाडौँ महानगरपालिकाले दर्ता नभएका बस टिकट बुकिङ काउन्टर हटाउन शुरू गरेको छ। काठमाडौँको ट्राफिक व्यवस्थापनलाई चुस्त र यात्रुमैत्री बनाउने उद्देश्यले महानगरले दर्ता नगरी सञ्चालनमा आएका टिकट बुकिङ काउन्टर हटाउन शुरू गरेको हो।

महानगरपालिकाका प्रहरी प्रमुख राजुनाथ पाण्डेले गत साउन २६ गते सूचना जारी गरी जथाभाबी रूपमा सञ्चालित काउन्टर हटाउने निर्णय गरिएको जनाउँदै दर्ता नभएका काउन्टर भदौ १ देखि हटाउन शुरू गरिएको जानकारी दिए। उनका अनुसार हालसम्म कोटेश्वरमा ४१, गौशालामा २७, चाबहिलमा २१ र गोँगबु क्षेत्रमा ११ काउन्टर हटाइएको छ।

कलंकी र बल्खु क्षेत्रमा पनि दर्ता नभएका काउन्टर हटाउन शुरू गरिएको प्रहरी प्रमुख पाण्डेले बताए। महानगर प्रहरीले चाबहिलमा अनधिकृत रूपमा निर्माण गरिएका १० काउन्टर डोजर लगाएर भत्काएको जनाएको छ।

उपत्यकाबाट बाहिर सञ्चालन हुने यात्रुवाहक सार्वजनिक सवारी साधनका लागि तोकिएको मापदण्डअनुरूप व्यावसायिक ठेगानासहित सम्बन्धित वडा कार्यालयमा बुकिङ कार्यालय अनिवार्य दर्ता गर्न महानगरले सम्बद्ध सबैलाई आग्रह गरेको छ। टिकट बुकिङ कार्यालय सडक चोकको एक सय मिटर वरपर खोल्न नपाउने, बुकिङ कार्यालयअन्तर्गत मुख्य कार्यालय गोँगबुस्थित नयाँ बसपार्कभित्र अनिवार्य रूपमा हुनुपर्ने, नयाँ बसपार्कदेखि महाराजगन्ज र बाफलसम्म कुनै पनि कार्यालय खोल्न नपाउने महानगरपालिकाले जनाएको छ।

यस्तै, बुकिङ कार्यालयमा अनिवार्य भाडादर उल्लेख गरिएको बोर्ड राख्नुपर्ने, टिकट काट्न आउने सेवाग्राहीका लागि अनिवार्य आधारभूत आवश्यकता (पार्किङ, शौचालय, पानी, बत्ती बस्ने)लगायत व्यवस्था हुनुपर्ने, कार्यालयका कोठा कम्तीमा १० देखि १५ फिटको हुनुपर्ने, कर्मचारीले पोसाक र परिचयपत्र अनिवार्य रूपमा लगाउनुपर्नेलगायत व्यवस्था गरेको छ।

यसअघि महानगरले काठमाडौँभित्र जथाभाबी रूपमा टिकट बुकिङ कार्यालय खोल्ने तथा सडकमा यात्रुलाई चढाउने सवारी साधनलाई नयाँ बसपार्कभित्रबाट मात्रै सञ्चालन गर्ने व्यवस्था गरेको थियो। सोही व्यवस्थाअनुसार अहिले अधिकांश सवारीसाधन नयाँ बसपार्कभित्रबाट सञ्चालन हुँदै आएका छन्।