नेपाल मलेसियासँग ६ विकेटले पराजित

काठमाडौँ– आईसीसी वुमन्स टी–२० एशिया क्षेत्र छनोटअघिको चारदेशीय सिरिजको आफ्नो तेस्रो खेलमा नेपालले मलेसियासँग ६ विकेटले पराजित भएको छ।

मलेसियाको बायोमास स्पोर्टस् एन्ड इभेन्ट कम्प्लेक्समा जितका लागि पाएको ८५ रनको लक्ष्य मलेसियाले  १६.२ ओभरमा ४ विकेट गुमाएर पूरा गर्‍यो।

यसअघि पहिला ब्याटिङ गरेको नेपालले निर्धारित १८ ओभरमा ७ विकेट गुमाउँदै ८३ रन बनाएको थियो। नेपालको ब्याटिङबीचमा वर्षाका कारण खेल रोकिएपपछि खेल १८ ओभरमा घटाइएको थियो।

नेपालका लागि कप्तान रूबिना क्षेत्रीले सर्वाधिक २३ रन बनाइन्। उनले २ चौका र १ छक्का प्रहार प्रहार गरिन्। ओपनिङमा आएकी काजल श्रेष्ठले २१ बलमा १ चौकासहित १८ रन बनाइन्।

त्यसपछि आएकी सीता राना मगर १३ बलमा ९ रन बनाउँदै क्याच आउट भइन्। ईन्दु बर्माले ३३ बलमा २० रन बनाउँदै चौथो विकेटका लागि कप्तान रूबिना क्षेत्रीसँग ३० रनको साझेदारी बनाइन्।

नेपालले पहिलो खेलमा हङकङलाई ६ विकेट र दोस्रो खेलमा कुवेतलाई ३८ रनले पराजित गरेको थियो। तर मलेसियासँग भने नेपाल पराजित भयो। यो चारदेशीय शृंखलापछि नेपालले मलेसियामा नै आईसीसी वुमन्स टी–२० एशिया क्षेत्र छनोट खेल्ने छ।