जनताले नयाँपन महसुस गर्नेगरी सरकारले कार्ययोजना बनाउँदै छ: मन्त्री खड्का

काठमाडौँ– उपप्रधानमन्त्री एवं रक्षामन्त्री तथा नेपाली कांग्रेसका उपसभापति पूर्णबहादुर खड्काले सरकार सुशासन र भ्रष्टाचार नियन्त्रण गर्ने काममा लागिरहेको बताएका छन्। शनिबार काठमाडौँमा आयोजित कार्यक्रमलाई सम्बोधन गर्दै उनले मुलुकमा सुशासन, भ्रष्टाचार, अनियमितताको नियन्त्रण समग्र अभियानलाई वर्तमान सरकार केन्द्र भागमा राखेर अघि बढिरहेको उल्लेख गरेका हुन्।

मन्त्री खड्काले सरकारले कमजोरीलाई सुधारेर देशभर सुशासनका लागि विशेष अभियान चलाउने तयारी गरिरहेको बताए। सुशासनको कार्ययोजना तयार पारेर जनताले पाउने सेवा समयमा पाउनका लागि सरकारले नयाँ कार्ययोजना बनाइरहेको बताए। उनले सरकारबाट दिनुपर्ने सेवामा नयाँपनको गतिको अनुभव जनताले महसुस गर्ने गरी सरकार अघि बढिरहेको बताए।

“सुशासनको कार्ययोजना तयार पारेर जनताले पाउने सेवा समयमा पाउनका लागि हामीले पहल गरिरहेका छौँ,” उनले भने, “अब यो महिनाभित्रै त्यो कार्ययोजना तयार भएर मन्त्रिपरिषद्ले पास गरेर कार्ययोजनामार्फत सरकार र देशसँग जोडिएका सम्पूर्ण संयन्त्रहरूलाई सुशासनको कार्ययोजनाको घेराभित्र अनुशासित बनाउँदै आमनेपाली जनतामा एउटा नयाँखालको प्रभाव, सरकारबाट दिनुपर्ने सेवामा नयाँपनको गतिको अनुभव आमनागरिकले महसुस गर्ने गरी वर्तमान सरकारले गरिरहेको छ।”

मन्त्री खड्काले सरकार दोषी छुट्नु हुँदैन र निर्दोष फस्नु हुँदैन भन्ने पक्षमा काम गरिरहेको उल्लेख गरे। उनले कुनै पनि खालको भ्रष्टाचार र अनियमितताको निष्पक्ष छानबिन हुनुपर्ने पक्षमा आफू रहेको बताए।