पाल्पामा गुडिरहेको गाडीमाथि ढुंगा खस्दा ३ जनाको मृत्यु, ६ घाइते

काठमाडौँ– पाल्पाको रिब्दीकोट गाउँपालिका–२ जोर्तेमा ढंगा खसेर सडकमा गुडिरहेको गाडीलाई पुर्दा तीन जनाको मृत्यु भएको छ। 

गाडीमा सवार अन्य छ जना घाइते भएको वडाध्यक्ष ओमप्रसाद पोखरेलले जानकारी दिए। उनका अनुसार गुल्मीको तम्घासबाट बुटवलतर्फ गइरहेको गाडी बुधबार बिहान ९:१५ बजेतिर दुर्घटनामा परेको हो। 

“दुई पुरुष र एक महिलाको घटनास्थलमा नै मृत्यु भएको हो। उहाँहरू गाडीको पछाडिको सिटमा बस्नुभएको रहेछ,” वडाध्यक्ष पोखरेलले भने।

घाइतेलाई उपचारका लागि पाल्पास्थित मिसन अस्पताल लगिएको छ।