आईसीसी महिला टी–२० विश्वकप छनोट: नेपालद्वारा मलेसिया ५ रनले पराजित

काठमाडौँ– मलेसियामा जारी आईसीसी महिला टी–२० क्रिकेट विश्वकपको एशिया क्षेत्र छनोटमा नेपालले मलेसियालाई ५ रनले पराजित गरेको छ। 

बिहीबार बिहान सम्पन्न खेलमा ८५ रनको विजयी लक्ष्य पछ्याएको मलेसियाले निर्धारित २० ओभरमा ९ विकेट गुमाउँदै ७९ रन बनायो। मलेसियाका कप्तान विनिफर्ड दुराइसिंघमले सर्वाधिक २८ रन बनाइन्। अइन्ना हसिमले १४ तथा मास इलिसाले १० रनको योगदान दिए।

नेपालका कविता जोशी र कविता कुँवरले समान २/२ विकेट लिए। कप्तान रुविना क्षेत्री र अस्मिना कर्माचार्यका नाममा १/१ विकेट रह्यो।

त्यसअघि क्वालाम्पुरस्थित वायुमास ओभल क्रिकेट मैदानमा मलेसियाले टस जितेर पहिला फिल्डिङ रोजेपछि ब्याटिङमा उत्रिएको नेपालले निर्धारित २० ओभरमा ६ विकेट गुमाउँदै ८४ रन बनाएको हो।

नेपालका सीता रानामगरले सर्वाधिक ३८ रनको योगदान दिइन्। उनी ५४ बलमा नटआउट रहिन्। अप्सरी बेगमले १७, कप्तान रुविना क्षेत्रीले १२ तथा पूजा महतोले ५ रन बनाए। 

मलेसियाका अइन्ना हसिमले २ तथा इज्जाति इस्माइल, एलिसा फर्दाउज र नुर अटिलाले समान १/१ विकेट लिए। 

प्रतियोगितामा नेपाल समूह ‘ए’मा रहेको छ। नेपालको समूहमा मलेसिया, बहराइन, भुटान, कतार र यूएई छन्।