मेक्सिकोमा तीव्र हुँदै जेन–जी आन्दोलन

उत्तर अमेरिकी देश मेक्सिको सिटीमा जेन–जी आन्दोलनले गति लिइरहेको छ। अपराध र भ्रष्टाचार विरुद्ध प्रदर्शन गर्न हजारौं युवा प्रदर्शनकारीहरू शनिबार मेक्सिको सिटीको सडकमा उत्रिए।

प्रदर्शनकारीहरूले प्रहरीसँग झडप गरे, ढुंगा हाने र लाठी र साङ्लोले आक्रमण गरे। मेक्सिको सिटीका सुरक्षा सचिव पाब्लो भाज्क्वेजका अनुसार यस विरोध प्रदर्शनमा १२० जना घाइते भएका छन्,  जसमध्ये १०० जना प्रहरी अधिकारी रहेका छन्।

जेन–जी आन्दोलनलाई विपक्षी दलका वृद्ध समर्थकहरूबाट पनि बलियो समर्थन मिलिरहेको छ। यस वर्ष विभिन्न देशमा त्यहाँका जेनजी युवाहरूले असमानता, लोकतान्त्रिक पतन र भ्रष्टाचार विरुद्ध विरोध प्रदर्शनहरू आयोजना गरेका छन्।

गत सेप्टेम्बरमा सामाजिक सञ्जालमा प्रतिबन्ध लगाइएपछि नेपालमा सबैभन्दा ठूलो जेन–जी विरोध प्रदर्शन भएको थियो, जसले गर्दा नेपालका तत्कालीन प्रधानमन्त्रीले राजीनामा दिनुपरेको थियो।

मेक्सिकोमा, धेरै युवाहरूले भ्रष्टाचार र हिंसा जस्ता प्रणालीगत समस्याहरूबाट निराश भएको बताएका छन्। मेक्सिकोमा, समुद्री डाकुको खोपडी भएको झण्डा जेन जेड आन्दोलनको प्रतीक बनेको छ, र प्रदर्शनकारीहरूले यो झण्डा फहराइरहेका छन्।

पश्चिमी राज्य मिचोआकानका एक लोकप्रिय मेयरको हत्यासहित हालैका धेरै उच्च-प्रोफाइल हत्याहरूको बाबजुद मेक्सिकन राष्ट्रपति क्लाउडिया शेनबाउमको लोकप्रियता यथावत छ। शेनबाउमले दक्षिणपन्थी दलहरूलाई जेन–जी आन्दोलनमा घुसपैठ गरेको र मानिसहरूलाई परिचालन गर्न सामाजिक सञ्जाल प्रयोग गरेको आरोप लगाएकी छन्।