कामबाट निकालिएको रिसमा हत्या, २ जना पक्राउ

रौतहट– बारा प्रहरीले पानी फ्याक्ट्रीका प्रबन्धकको हत्यामा संलग्न रहेको आरोपमा दुई जनालाई पक्राउ गरी सार्वजनिक गरेको छ। पक्राउ पर्नेमा पर्सा वीरगञ्ज महानगरपालिका–२२ मनियारीका २१ वर्षीय राजन कुमार राम र उनका साथी सोही ठाउँका ३२ वर्षीय प्रमोद साह तुरहा रहेका छन्।

उनीहरूमाथि प्रसौनी गाउँपालिका–६ भलुही चोकस्थित किरण बेभरेज नेपाल प्रालि (पानी फ्याक्ट्री)का प्रबन्धक राम किशोर सिंहको हत्यामा संलग्न रहेको आरोपमा छन्। फ्याक्ट्रीनजिकै धारिलो छुरा तथा इँटाले टाउकोमा प्रहार गरी हत्या भएको अवस्थामा शुक्रबार बिहान सिंहको शव फेला परेको थियो।

घटनास्थल तथा अभियुक्तहरूको साथबाट रगत लागेको फलामको छुरा र इँटा बरामद भएको जिल्ला प्रहरी कार्यालय बाराका निमित्त प्रवक्ता एवं प्रहरी निरीक्षक खेमप्रसाद नेपालले जानकारी दिए। उनका अनुसार, राजनलाई भारततर्फ भाग्दै गरेको र तुरहालाई वीरगन्ज महानगरपालिका वडा नं. २२ मा लुकिछिपी बसेको अवस्थामा पक्राउ गरिएको हो।

प्रहरी अनुसन्धानबाट हत्याको मुख्य कारण पुरानो रिसइबी र कामबाट निकालिएको रिस रहेको खुलेको छ। दुवैले फ्याक्ट्रीबाट निकालिएको रिस र विभिन्न समयमा भएको वादविवादका कारण हत्या गरेको प्रहरीसमक्ष स्वीकार गरेका छन्।

पक्राउ परेका दुवै जनाविरुद्ध कर्तव्य ज्यान मुद्दा दर्ता गरी बारा जिल्ला अदालतबाट सात दिनको म्याद थप गरी थप अनुसन्धान भइरहेको जिल्ला प्रहरी कार्यालय बाराले जनाएको छ।