प्रभु बैंकका सीईओ अशोक शेरचन पक्राउ

काठमाडौँ– प्रहरीले प्रभु बैंकका प्रमुख कार्यकारी अधिकृत (सीईओ) अशोक शेरचनलाई पक्राउ गरेको छ।

नेपाल प्रहरीको केन्द्रीय अनुसन्धान ब्युरो (सीआईबी)को टोलीले आइतबार उनलाई पक्राउ गरेको हो। बैंकिङ कसुरमा शेरचनलाई पक्राउ गरेको सीआईबीका प्रवक्ता शिवकुमार श्रेष्ठले उकालोलाई बताए।

सीआईबीको टोलीले बैंकका डेपुटी सीईओ मनिराम पोखरेललाई पनि अनुसन्धानका लागि पक्राउ गरेको छ। साथै, प्रमुख कर्जा अधिकृत (सीआरओ) रिवाश श्रेष्ठ पनि पक्राउ गरेका छन्।

उनीहरूलाई सीआईबीले बैंकको केन्द्रीय कार्यालय परिसरबाटै पक्राउ गरेको हो। प्रवक्ता श्रेष्ठले उनीहरूले बैंकलाई हानि-नोक्सानी पुर्‍याएको र बैंकको कर्जा दुरुपयोग गरेको देखिएको बताए। “यसमा अपरेसन नै भइरहेको छ, अनुसन्धान जारी छ,” उनले भने।

सीआईबीले प्रतिवादी कुसुम लामामाथि अनुसन्धान गरिरहेको ठगी, आपराधिक विश्वासघात र नेपाल राष्ट्र बैंक ऐन, २०५८ अन्तर्गतको कसुर मुद्दाको सिलसिलामा संकलित विवरणको विज्ञ टोलीले अध्ययन गरेको थियो। 

अध्ययनका क्रममा सीईओ शेरचनसमेत राष्ट्र बैंकको निर्देशन र प्रचलित कानुनविपरीत कार्य गरी बैंकलाई हानि-नोक्सानी पुर्‍याएको र उक्त अपराध लुकाउन विभिन्न कम्पनीको नाममा करोडौँ रकम कर्जा दुरुपयोगमा संलग्न रहेको खुलेको हो।

सीआईबीका अनुसार, बैंकिङ कसूर तथा सजाय ऐन, २०६४ अन्तर्गतको कसुरमा पक्राउ परेका उनीहरूमाथि थप अनुसन्धान भइरहेको छ।

यसअघि, सीआईबीले कात्तिक २१ गते राति प्रभु बैंकको मुख्यालयमा छापा मारी दुई दर्जनभन्दा बढी महत्त्वपूर्ण फाइल नियन्त्रणमा लिएको थियो।

प्रभु समूहका अध्यक्ष तथा प्रभु बैंकका पूर्वअध्यक्ष देवीप्रकाश भट्टचनमाथिको अनुसन्धानका क्रममा सीईओ शेरचनको संलग्नताको शंका बढेपछि बैंकमा आकस्मिक छापा मारेको सीआईबीले जनाएको थियो।

यो पनि,

देवी भट्टचन–अशोक शेरचनले अपचलन गरेको ४८ लाख डलर

भट्टचन–शेरचनले प्रभु बैंकमा दुरुपयोग गरेको २७ करोड