आगलागीका घटनामा वृद्धि, सचेत रहन प्राधिकरणको आग्रह

काठमाडौँ– हिउँद लागेसँगै देशभर आगलागीका घटना बढेका छन्। मंसिर ११ गतेदेखि १२ गतेसम्म देशभर १७ वटा विपद्का घटना भएकामा बढी १४ आगलागीका घटना भएका छन्। 

विपद्‌मा परेर ४९ लाख १८ हजार ५०० रुपैयाँ बराबरको क्षति भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। उक्त समयमा झापामा मात्रै चार आगलागीका घटना भएका थिए। कैलालीमा दुई तथा मोरङ, संखुवासभा, रौतहट, बारा, काठमाडौँ, नवलपरासी पश्चिम, जुम्ला र कञ्चनपुरमा एक/एक आगलागीका घटना भएका थिए।

सुक्खा मौसम शुरू भए लगत्तै देशव्यापी रूपमा आगलागीका घटनामा वृद्धि भएकाले सावधानी अपनाउन प्राधिकरणले आग्रह गरेको छ। छिट्टै आगो टिप्ने सामग्री नराख्न, ज्वलनशील पदार्थको पहुँचबाट टाढा रहन र आगजनीबाट जोगिन प्राधिकरणले आग्रहसमेत गरेको छ।