‘जेनजी’ अगुवा र प्रशासनबीच वार्ता, सिमराको अवस्था सामान्य बन्दै

बारा– ‘जेनजी’ अगुवा र स्थानीय प्रशासनबीच वार्ता शुरू भएको छ। सशस्त्र प्रहरी रुद्रवाहिनी पथलैयामा वार्ता शुरू भएको हो।

वार्तामा ‘जेनजी’ पक्षबाट बारा संयोजक सम्राट् उपाध्यायसहित १८ जना र प्रशासनका तर्फबाट प्रमुख जिल्ला अधिकारी धर्मेन्द्रकुमार मिश्रसहित सुरक्षा निकायका प्रमुखको सहभागिता रहेको सहायक प्रमुख जिल्ला अधिकारी पुरुषोत्तम भट्टराईले जानकारी दिए।

बाराको सिमरामा बुधबार ‘जेनजी’ र नेकपा एमालेका कार्यकर्ताबीच विवाद भएपछि असामान्य अवस्था बनेको थियो। त्यसपछि यहाँ स्थानीय प्रशासनले दुई दिन ‘कर्फ्यु’ लगाउनुपरेको थियो।

प्रदर्शन पक्षधरले आफूहरूलाई एमालेका नेता कार्यकर्ताले कुटपिट गरेको भन्दै संलग्नलाई पक्राउ गरी कारबाहीको माग गर्दै प्रदर्शन जारी राखेका थिए। घटनामा संलग्न भएको आरोपमा प्रहरीले तीन जनालाई पक्राउ गरेपछि सिमराको अवस्था सामान्य बन्दै गएको छ।

शुक्रबार बिहानदेखि जनजीवन सामान्य बन्दै गएको, यातायात पनि पूर्ण रूपमा सञ्चालनमा रहेको जिल्ला प्रशासन कार्यालयले जनाएको छ।

स्थानीय प्रशासनको आग्रहपछि अभियन्ता सुदन गुरुङ, ‘जेनजी’ नेता पुरुषोत्तम यादवलगायत काठमाडौँबाट मधेश आएका छन्। उनीहरू वार्तामा सहभागी भएपछि निष्कर्षमा पुगिने जनाइएको छ।