नेप्से परिसूचक २६.५१ अंकले घट्यो, कारोबार रकम भने बढ्यो

काठमाडौँ– साताको पहिलो कारोबार दिन आइतबार नेपाल स्टक एक्सचेन्ज (नेप्से) परिसूचक घटेको छ। परिसूचक २६.५१ अंकले घटेर २,६४९.५२ को विन्दुमा रोकिएको हो। यसअघि बिहीबार परिसूचक १०.४३ अंकले बढेको थियो।

आइतबारको कारोबारमा सेन्सेटिभ इन्डेक्स ४.६७, फ्लोट इन्डेक्स २.०६ र सेन्सेटिभ फ्लोट इन्डेक्स १.६६ अंकले घटेको छ।

नेप्से परिसूचक घटे पनि आइतबार कारोबार रकममा भने वृद्धि भएको छ। आइतबार ३४२ कम्पनीको सात अर्ब आठ करोड ५४ लाख रुपैयाँ बराबरको कारोबार हुँदा एक करोड ५७ लाख ३६ हजार कित्ता शेयर ८४ हजार १५६ पटक किनबेच भएको छ। यसअघि बिहीबार ६ अर्ब ६६ करोड २३ लाख रुपैयाँ बराबरको एक करोड ४६ लाख ९३ हजार कित्ता शेयर कारोबार भएको थियो।

आइतबार कारोबार भएका १३ समूहमध्ये ‍११ वटाको उपसूचक घटेको छ भने उत्पादन तथा प्रशोधन र म्युचुअल फन्ड समूहको उपसूचक सामान्य बढेको छ।

लगानी समूहको उपसूचक सर्वाधिक १.४८ प्रतिशत घटेको छ। त्यस्तै, बैंकिङ, विकास बैंक, जलविद्युत्, जीवन बीमा, लघुवित्त र अन्य उपसमूहको परिसूचक एक प्रतिशतभन्दा बढी घटेका छन्।

आइतबार पाँच कम्पनीको शेयर मूल्य सकारात्मक सर्किट लेभलमा कारोबार भएको छ। ती कम्पनीहरू सागर डिस्टिलरी, निफ्रा ग्रिन इनर्जी डिबेन्चर, स्वस्तिक लघुवित्त, झापा इनर्जी र श्रीनगर एग्रिटेक इन्डस्ट्रिज हुन्।

यस दिन एनएमबी डिबेन्चर २०९० को शेयर मूल्यमा सर्वाधिक गिरावट आयो, जसको मूल्य प्रतिकित्ता ८.९९ प्रतिशतले घटेको छ।

कारोबार रकमका आधारमा हिमालयन रिइन्स्योरेन्स, जोशी हाइड्रोपावर, ग्रिन भेन्चर लिमिटेड र एनआरएन इन्फ्रास्ट्रक्चर एन्ड डेभलपमेन्टको शेयर सबैभन्दा बढी किनबेच भएको छ।