रुससँग लड्न युक्रेनले फ्रान्सबाट १०० राफेल लडाकु विमान खरिद गर्ने

काठमाडाैँ– युक्रेनले रुसी आक्रमणबाट बच्न फ्रान्सेली राफेल एफ-४ लडाकु विमान र उन्नत हवाई रक्षा प्रणाली खरिद गर्ने भएको छ।

युक्रेनले सोमबार देशको दीर्घकालीन सुरक्षालाई सुदृढ पार्ने प्रयासको रूपमा आगामी १० वर्षमा फ्रान्सबाट १०० वटा राफेल युद्धक विमान, ड्रोन, वायु रक्षा प्रणाली र अन्य प्रमुख उपकरणहरू खरिद गर्ने आशय पत्रमा हस्ताक्षर गरेको हो। सम्झाैतामा युक्रेनी राष्ट्रपति भोलोदिमिर जेलेन्स्की र फ्रान्सेली राष्ट्रपति इमानुएल म्याक्रोनले हस्ताक्षर गरेका हुन्। यो सम्झौता पेरिस नजिकैको एक एयरबेसमा भएको थियो।

जेलेन्स्कीले यो कदमलाई 'ऐतिहासिक' भनेर वर्णन गरे। "यो एक रणनीतिक सम्झौता हो जुन अर्को वर्षदेखि १० वर्षसम्म रहनेछ," उनले म्याक्रोनसँगको संयुक्त ब्रिफिंगमा भने।

युक्रेनले धेरै बलियो फ्रान्सेली राडारहरू,आठ वायु रक्षा प्रणाली र अन्य उन्नत हतियारहरू पनि प्राप्त गर्ने जेलेन्स्कीले बताए। राफेल एफ-४ विमानको डेलिभरी २०३५ सम्ममा पूरा गर्ने योजना छ, जबकि इन्टरसेप्टर ड्रोनको संयुक्त उत्पादन यसै वर्ष शुरू हुँदैछ।

फ्रान्स र युक्रेनबीचको सम्झौताको वित्तीय विवरण अन्तिम रूप दिइएको छैन, तर धेरै रिपोर्टहरूले फ्रान्सले युरोपेली संघबाट कोष जुटाउने र जफत गरिएका रूसी सम्पत्तिहरू प्रयोग गर्ने योजना बनाएको दाबी गरेका छन्। यसलाई विवादास्पद कदम मानिन्छ, जसको बारेमा युरोपेली संघका २७ सदस्यहरूको राय विभाजित छ।

फेब्रुअरी २०२२ मा रुसको पूर्णस्तरीय आक्रमणपछि पेरिसको आफ्नो नवौं भ्रमणमा रहेका जेलेन्स्कीले युक्रेनको प्रतिरक्षालाई बलियो बनाउन खोजिरहेका छन्।