क्यानको सचिवमा पारस खड्का र प्रशान्तविक्रम मल्लको उम्मेदवारी

काठमाडौँ– नेपाल क्रिकेट संघ (क्यान)को सचिवमा पूर्वकेन्द्रीय सदस्य प्रशान्त विक्रम मल्ल र राष्ट्रिय टोलीका पूर्वकप्तान पारस खड्काबीच प्रतिस्पर्धा हुने भएको छ। 

शनिबार बिहान भएको मनोनयनमा क्यानको सचिवमा खड्का र मल्लले उम्मेदवारी दिएका हुन्। खड्काले अध्यक्ष चतुरबहादुर चन्द प्यानलबाट उम्मेदवारी दिएका हुन् भने मल्लले स्वतन्त्र उम्मेदवारी दिएका हुन्।

अध्यक्षमा भने चन्द निर्विरोध निर्वाचित भइसकेका छन्। उनको प्यानलबाट कोषाध्यक्षमा पदम खड्का र उपाध्यक्षमा रोशनबहादुर सिंह पनि निर्विरोध भएका छन्। 

यसैगरी, महिला सदस्यमा जयन्ती भट्ट, कर्णाली प्रदेशबाट सदस्यमा श्रीधर केसी र लुम्बिनी प्रदेशबाट प्रदीप मजगैयाँ पनि सर्वसम्मत निर्वाचित भएका छन्। 

क्यानको १७ सदस्यीय कार्यसमितिमध्ये ६ पदमा सर्वसम्मत भएको हो। अब सचिवसहित कुल ११ पदमा निर्वाचन हुनेछ। हरेक प्रदेशबाट एक एकजना सदस्य निर्वाचित हुनेछन्।