एशियाली खेलकुद: डुंगा दौडमा चीनलाई स्वर्ण

काठमाडौँ– आयोजक राष्ट्र चीनले आइतबार एशियाली खेलकुदको पहिलो स्वर्ण पदक जितेको छ।

महिलातर्फको डुंगा दौडमा चीनले पहिलो स्वर्ण हात पारेको हो।  ‘लाइटवेट डबल स्कल्स रोइङअन्तर्गत भएको फाइनलमा जोउ जियाकी र किउ सिउपिङले स्वर्ण जितेका हुन्। 

जोउ र किउको चिनियाँ जोडीले ७ मिनेट ६.७८ सेकेन्डमा दौड पूरा गर्दै स्वर्ण जितेका हुन्। उनीहरूले उज्बेकिस्तानका लुइजाखोन इस्लामोभा र मलाइका ताग्माटिभालाई १० सेकेन्डले पछि पारे। इन्डोनेसियाका चेल्सी कर्पुट्टी र रहमा मुतियारा पुत्रीले कास्य जित्न सफल भएका छन्। 

महिलातर्फको १० मिटर एयर राइफल प्रतियोगितामा भारतका रमिता, मेहुली घोष र आशी  त्रिकुटले रजत पदक जितेर पहिलो दिनको विजयी शुरूआत गरेका छन्। भारतीय सेनाका खेलाडीद्वय अर्जुन लाल जाट र अरविन्दले पुरुष लाइटवेट डबल स्कल्‌समा रजत नै जितेका छन्। 

भारतीय महिला क्रिकेट टोलीले पनि सेमिफाइनलमा बंगलादेशलाई ८ विकेटले पराजित गर्दै रजत पदक सुनिश्चित गरेको छ। हालसम्म भारतले पाँच वटा रजत पदक आफ्नो पोल्टामा पारेको छ।