देवको शतकमा उपाधि जित्न नेपालले यूएईलाई दियो २८१ रनको लक्ष्य

काठमाडौँ– कप्तान देव खनालको शतकप्रेरित नेपालले यू–१९ प्रिमियर कपको उपाधि जित्न यूएईलाई २८१ रनको लक्ष्य दिएको छ।

मलेसियामा जारी फाइनलमा नेपालले निर्धारित ५० ओभरमा ८ विकेट गुमाउँदै २८० रन बनाएको हो। नेपालका कप्तान देव खनालले १०० रनको शतकीय इनिङ्स खेले।

उनले ९२ बलमा ९ चौका र ३ छक्का प्रहार गरे। उत्तम थापामगरले ६७ बलमा ४ चौका र १ छक्कासहित महत्वपूर्ण ५७ रन जोडे।

ओपनर अर्जुन कुमाल ७८ बलमा ४ चौकासहित ५५ रनमा आउट भए। दीपक डुम्रेले ३० बलमा २ चौका र १ छक्कासहित २८ रन बताए।

दीपेश कँडेल ७ बलमा १ चौकासहित १० रनमा अविजित रहे। यूएईका हरित शेठ्ठीले सर्वाधिक ५ तथा  कप्तान आयन खानले २ विकेट लिए।