विश्वकप क्रिकेट: पाकिस्तानसँग बंगलादेश ७ विकेटले पराजित

भारतमा जारी आईसीसी एकदिवसीय विश्वकपमा पाकिस्तानले बंगलादेलाई सात विकेटले हराएको छ। मंगलबार राति सम्पन्न खेलमा बंगलादेशले दिएको २०५ रनको लक्ष्य पाकिस्तानले ३२.३ ओभरमा ३ विकेट गुमाएर भेटायो।

जितसँगै सात खेलमा ६ अंक जोडेको पाकिस्तान पाँचौँ स्थानमा उक्लिएको छ। छैटौँ पराजयसँगै दुई अंक जोडेर नवौँ स्थानमा रहेको बंगालदेशको सेमिफाइनल सम्भावना समाप्त भएको छ। 

पाकिस्तानका लागि फखर जमानले ७४ बलमा सात छक्का र तीन चौकासहित सर्वाधिक ८१ रन बनाए। यसैगरी अब्दुला शफिकले ६९ बलमा नौ चौका र दुई छक्कासहित ६८, मोहम्म रिजवानले अविजित २६ र इफ्तिखर अहमदले अविजित १७ रन जोडे। बलिङतर्फ बंगलादेशका मेहिदी हसन मिराजले ३ विकेट लिए।

कोलकातास्थित इडेन गार्डेनमा टस जितेर ब्याटिङ गरेको बंगलादेश ४५.१ ओभरमा २०४ रनमा अलआउट भयो। बंगलादेशका महमदुल्लाहले सर्वाधिक ५६ रन बनाए। यस्तै लिटन दास ४५ र कप्तान शकिब अल हसन ४३ रनमा आउट भए। बलिङतर्फ पाकिस्तानका शाहीन अफरिदी र मोहम्मद वसिमले समान ३ तथा हरिस रउफले २ विकेट लिएका थिए।