टी–२० विश्वकप छनोट: समूह विजेता बन्न नेपाल र ओमानबीच प्रतिस्पर्धा हुँदै

काठमाडाैँ– आईसीसी टी–२० विश्वकप एशिया छनोटअन्तर्गत समूह ‘ए’ को विजेता बन्न बिहीबार नेपाल र ओमानबीच प्रतिस्पर्धा हुँदैछ। खेल बिहान ९ बजे कीर्तिपुरस्थित त्रिवि मैदानमा हुनेछ। 

प्रतियोगितामा समान दुई खेल खेलका दुवै टोली अपराजित छन्। पहिलो खेलमा नेपालले सिंगापुरलाई ८ तथा दोस्रो खेलमा मलेसियालाई ६ विकेटले हराएको थियो। यस्तै, ओमानले मलेसियालाई ३२ र सिंगापुरलाई २२ रनले हराएको थियो। नेपाल र ओमानबीचको खेलले समूह ‘ए’ को विजेता तय गर्नेछ। दुवै टोली यसअघि नै सेमिफाइनलमा पुगिसकेका छन्।

टी–२० मा नेपाल र ओमानबीच चार खेल भएका छन्। जसमा नेपाल तीन र ओमान एक खेलमा विजयी भएको छ। त्यसैले पनि नेपालले यो खेल जित्ने सम्भावना बलियो छ।

आज हुने अरु खेलमा समूह ‘ए’ का मलेसिया र सिंगापुरबीच दिउँसो साढे १ बजे कीर्तिपुरमा, समूह ‘बी’ का हङकङ र यूएई बिहान ९ बजे तथा बहराइन र कुवेत दिउँसो साढे १ बजे मूलपानीमा खेल्नेछन्।

आठ टोली सहभागी प्रतियोगिताको फाइनल खेल्ने टोली आगामी वर्ष हुने टी–२० विश्वकपमा स्थान बनाउने छ।