एसीसी प्रिमियर कपमा कतारलाई नेपालले दियो २११ रनको लक्ष्य

काठमाडौँ– एसीसी प्रिमियर कपमा नेपालले कतारलाई जितका लागि २११ रनको लक्ष्य दिएको छ। दीपेन्द्र सिंह ऐरीले एकै ओभरमा लगातार ६ छक्का प्रहार गरेसँगै नेपालले कतारसामु २११ रनको लक्ष्य प्रस्तुत गरेको हो।

ओमानमा जारी प्रतियोगिताको दोस्रो खेलमा शनिबार नेपाल कतारविरुद्ध टस जितेर पहिले ब्याटिङमा उत्रिएको थियो। सो क्रममा नेपालले ७ विकेट गुमाएर २१० रन बनायो।

नेपालका लागि दीपेन्द्र सिंह ऐरीले २१ बलमा ७ छक्का र तीन चौकाको मदतमा ६४ रन बनाउँदै अविजित रहे। उनले अन्तिम ओभरमा लगातार ६ छक्का प्रहार गरेका थिए। त्यस्तै, आशिफ शेखले ५२, कुशल मल्ल ३५, कप्तान रोहित पौडेलले १८ र कुशल भुर्तेल १२ रनको योगदान दिए।

बलिङतर्फ कतारका हिमान्सु रोहित र मुशावर शाहले सामान ३/३ विकेट लिए। अमिर फारूखको नाममा १ विकेट रह्यो। अहिले कतार जवाफी ब्याटिङ गरिरहेको छ।

नेपालले शुक्रबार भएको पहिलो खेलमा मलेसियालाई ५ विकेटले पराजित गरेको थियो।