बांग्लादेशमाथि दक्षिण अफ्रिकाको रोमाञ्चक जित

काठमाडौँ– आईसीसी टी२० विश्वकप क्रिकेटमा दक्षिण अफ्रिकाले बंगलादेशमाथि रोमाञ्चक जित दर्ता गरेको छ। 

सोमबार राति न्युयोर्कमा बांग्लादेशलाई ४ रनले पराजित गर्दै दक्षिण अफ्रिकाले लगातार तेस्रो जित हासिल गरेको हो। 

११४ रनको विजयी लक्ष्य पछ्याएको बांग्लादेशले निर्धारित २० ओभरमा ७ विकेट गुमाउँदै १०९ रन मात्र बनाउन सक्यो। 

बांग्लादेशका लागि टोहिड हृदोयले सर्वाधिक ३७ रनको योगदान दिए। महमदुल्लाह २० तथा नजमल हसन शान्टो १४ रनमा आउट भए। 

दक्षिण अफ्रिकाका केशव महाराजले ३ विकेट लिए। कागीसो रबाडा र एनरिच नोर्ट्जेका नाममा समान २-२ विकेट रह्यो। 

त्यसअघि टस जितेर पहिला ब्याटिङ रोजेको दक्षिण अफ्रिकाले निर्धारित २० ओभरमा ६ विकेट गुमाएर ११३ रन बनायो। हेनरिक क्लासेनले सर्वाधिक ४६ रन बनाए। डेविड मिलरले २९ तथा क्विन्टन डीककले १८ रनको योगदान दिए। 

बांग्लादेशका तान्जिम हसन सकिबले ३ तथा तास्किन अहमदले २ र रिशाद होस्सेनले १ विकेट लिए।