देशका विभिन्न स्थानमा भारी वर्षा, बाढी र पहिरोको सम्भावना

काठमाडौँ– मनसुनी वायुको प्रभावसँगै देशका विभिन्न स्थानमा भारी वर्षा भएको छ।

पर्वतको कार्किनेटा, पाल्पाको बल्ड्याङगढी, स्याङजाको पन्चमुल, सिन्धुपाल्चोकको मानेखर्क, बाँसखर्क र धाप, कपिलवस्तुको भगवानपुर र तौलिहवा, दाङको कोइलाबास र लालमटिया, बागलुङको गल्कोट, गुल्मीको मुसीकोट र भार्से तथा अर्घाखाँचीको आँपचौर क्षेत्रमा राति भारी वर्षा भएको मौसम पूर्वानुमान महाशाखाले जनाएको छ। 

सो क्षेत्र भई बहने स-साना खोला तथा मझौला नदीहरूमा बहाव बढ्ने र कमजोर तथा भिरालो जमिनमा पहिरोको जोखिम हुनसक्ने भएकोले सतर्कता अपनाउन महाशाखाको अनुरोध छ। 

दिउँसो देशभर साधारणदेखि पूर्णतया बदली रहनेछ। कोशी, बागमती, गण्डकी, लुम्बिनी र सुदूरपश्चिममा भारी वर्षा हुनेछ। गण्डकीका एक-दुई स्थानमा धेरै भारी वर्षाको पनि सम्भावना रहेको महाशाखाले जनाएको छ।

यसैगरी, राति पनि देशभर धेरै स्थानमा मेघगर्जन र चट्याङसहित हल्कादेखि मध्यम वर्षा हुनेछ। कोशी,  बागमती, गण्डकी र लुम्बिनीका एक-दुई स्थानमा धेरै भारी वर्षाको सम्भावना छ।