यस्तो रहनेछ बिहीबारको मौसम

काठमाडौँ– देशभर मनसुनी वायुको प्रभाव रहेको छ। मनसुनको न्यूनचापीय रेखा भने सरदर स्थानको दक्षिणतर्फ रहेको मौसम पूर्वानुमान महाशाखाले जनाएको छ। 

जसको प्रभावले देशभर साधारणतया बदली रही गण्डकी, कोशी, बागमती र लुम्बिनीका थोरै तथा मधेश, कर्णाली र सुदूरपश्चिमका एक-दुई स्थानमा हल्कादेखि मध्यम वर्षा भइरहेको छ। 

दिउँसो देशभर आंशिकदेखि साधारणतया बदली रहनेछ। कोशी, बागमती, गण्डकी, कर्णाली प्रदेशका केही तथा बाँकी प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षा हुनेछ। कोशी, बाग्मती र सुदूरपश्चिमका एक-दुई  स्थानमा भारी  वर्षासमेत हुने महाशाखाले जनाएको छ। 

यसैगरी, राति कोशी, बागमती, गण्डकी, कर्णाली र सुदूरपश्चिमका केही तथा बाँकी प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षा हुनेछ। कोशी, मधेश, गण्डकी र सुदूरपश्चिमका केही स्थानमा भारी  वर्षाको सम्भावना रहेको महाशाखाले जनाएको छ।