माइकलको शतकमा नामिबियाले नेपाललाई दियो २७६ रनको लक्ष्य

काठमाडौँ– माइकल भ्यान लिङ्गेनको शतकप्रेरित घरेलु टोली नामिबियाले आईसीसी विश्वकप लिग २ अन्तर्गत त्रिदेशीय सिरिजमा नेपाललाई २७६ रनको लक्ष्य दिएको छ।

युनाइटेड क्रिकेट क्लबको खेल मैदानमा टस हारेर पहिला ब्याटिङको निम्तो पाएको नामिबियाले निर्धारित ५० ओभरमा ७ विकेट गुमाउँदै २७५ रन बनाएको हो।

नामिबियाका लागि लिङ्गेनले सर्वाधिक ११९ रन बनाए। उनले १११ बलमा १५ चौका र १ छक्का प्रहार गरे।

सन् २०२१ मा उनले ओमानविरुद्ध एकदिवसीय खेलमा डेब्यू गरेका थिए। त्यसपछि उनले नामिबिया, अमेरिका र पपुवा न्यूगिनी सम्मेलित त्रिदेशीय सिरिजमा करिअरकै पहिलो शतक बनाएका थिए।

पपुवा न्यूगिनीविरुद्ध भएको खेलमा उनले १०७ बलमा १३ चौका र ३ छक्कासहित अविजित रहँदै ११९ रन बनाएका थिए।

कप्तान गेरहार्ड इरास्मसले अर्धशतक प्रहार गरे। उनले ७६ बलमा १ चौका र २ छक्का प्रहार गरे। जन निकोलले ४०, दिवान ला ककले १८ र लो-हेन्ड्रे लोअरेन्सले १४ रको योगदान दिए।

जाने ग्रिन ९ रनमा आउट हुँदा पिक्की या फ्रान्स ११ रनमा अविजित रहे। नेपालका लागि ललित राजवंशीले सर्वाधिक ४ विकेट लिए। १० ओभर बलिङ गरेका उनले ३६ रन खर्चिए।

सोमपाल कामीले १० ओभरमा १ मेडनसहित ५३ रन खर्चिएर २ विकेट लिए। सागर ढकालले ६ ओभरमा २७ रन खर्चिएर १ विकेट लिए।

यसअघि नेपाल र नामिबियाबीच भएको पहिलो खेल वर्षाका कारण नतिजाविहीन भएको थियो। उक्त खेलमा दुवै टालीले अंक बाँकेका थिए। अर्को खेलमा नेपाल स्कटल्यान्डसँग ३ विकेटले पराजित भएको थियो।

७ टोली सहभागी लिग २ मा नेपाल २२ खेलमा १८ अंकसहित छैठौँ स्थानमा छ। नामिबिया भने २९ खेलमा ३५ अंकका साथ तेस्रो स्थानमा छ। नेपालले सिरिजको अन्तिम खेल भोलि स्कटल्यान्डसँग खेल्नेछ।