हटेन तराईमा शीतलहर , चिसाेले जनजीवन प्रभावित

काठमाडौँ– तराईमा शीतलहर हटेको छैन। तराईका धेरै क्षेत्र हुस्सु र कुहिरोले ढाकेको मौसम पूर्वानुमान महाशाखाले जनाएको छ।

एक हप्तादेखि परेको शीतलहर अझै एक दुई दिन रहने महाशाखाको भनाइ छ। शीतलहरका कारण तराई क्षेत्रको जनजीवन प्रभावित भएको छ। बिहान शीत झर्ने, दिनभर आकाश डम्म हुने भएकाले अत्यावश्यक कामबाहेक मानिसको हिँडडुल घटेको बारा सिमराका रामकृष्ण यादवले बताए।

तराईका केही जिल्लामा बढी चिसो हुने भएकाले विद्यालयमा बिदासमेत दिइएको छ। हुस्सु र कुहिरो लागिरहेकोले सडक तथा हवाई यातायातमा समस्या हुनसक्ने भन्दै महाशाखाले सतर्कता अपनाउन अपिलसमेत गरेको छ। आइतबार देशका पहाडी भूभागमा पनि आंशिक बदली हुने पूर्वानुमान छ।

प्रदेश १, कर्णाली र सुदूरपश्चिमका पहाडी भागमा आंशिक बदली रही बाँकी भागमा मौसम सामान्यतया सफा रहने महाशाखाले जनाएको छ।