मैत्रीपूर्ण खेलमा ओमानविरुद्ध नेपाल ५ विकेटले विजयी

काठमाडौँ– नेपालले ओमानसँगको मैत्रीपूर्ण खेलमा ५ विकेटले जित हात पारेको छ। शनिबार त्रिवि क्रिकेट मैदानमा भएको खेलमा ओमानले दिएको २४७ को लक्ष्य नेपालले पाँच विकेट छँदै पूरा गर्‍यो। नेपालले ओमानले दिएको लक्ष्य ४४.४ ओभरमा ५ विकेटको क्षतिमा पूरा गरेको हो।

नेपालका लागि तीन खेलाडीले अर्धशतकीय इनिङ्स खेले। अर्जुन साउद ६७, दिपेन्द्रसिंह ऐरीले ५९ र रोहित पौडेलले ५८ रन बनाए। त्यस्तै, ज्ञानेन्द्र मल्लले १५ र सन्दीप जोराले ११ रनको योगदान दिए।

टस जितेर पहिले ब्याटिङ रोजेको ओमानले पूरै ५० ओभर खेल्दै ९ विकेटको क्षतिमा २४६ रन जोडेको थियो। ओमानका लागि शोहिब खानले सर्वाधिक ८९ रन बनाए।

घरेलु टोली नेपालले एसीसी प्रिमियर कपअघि ओमानसँग अभ्यास खेल खेलेको हो। एसीसी प्रिमियर कप वैशाख ५ देखि १८ गतेसम्म कीर्तिपुर र मूलपानी मैदानमा हुँदैछ।

एसीसी प्रिमियर कपको समूह 'ए' मा ओमान र नेपालसँगै कतार, मलेसिया र साउदी अरब रहेका छन्। ओमानले समूह चरणका दुई खेल मूलपानी र दुई खेल त्रिवि क्रिकेट मैदानमा खेल्नेछ।

समूह 'बी' मा हङकङ, युएई, कुवेत, सिंगापुर र बहराइन छन्। हरेक समूहबाट शीर्ष दुई टोली सेमिफाइनलमा पुग्नेछन्। फाइनल खेल मे १ मा हुने छ। प्रतियोगिताको विजेता एशिया कपमा छनोट हुनेछ।