सुदूरपश्चिम, कर्णाली र गण्डकीमा मेघगर्जनसहित वर्षाको सम्भावना

काठमाडौँ– हाल देशमा पश्चिमी र स्थानीय वायुको प्रभाव छ। सुदूरपश्चिम, कर्णाली, लुम्बिनी र गण्डकी प्रदेशमा आंशिक बदली रहेको मौसम पूर्वानुमान महाशाखाले जनाएको छ।

दिउँसो सुदूरपश्चिम, कर्णाली र गण्डकी प्रदेशमा मेघगर्जन र चट्याङसहित वर्षा हुने छ। तराईका केहीस्थानमा अपराह्नपछि हावाहुरी चल्ने सम्भावना रहेको महाशाखाले जनाएको छ। यस्तै, कोशी प्रदेशमा राति पनि मेघगर्जन र चट्याङसहित वर्षा हुने छ।

वर्षा, हावाहुरी र चट्याङबाट हुनसक्ने क्षति र जोखिमबाट बच्न आवश्यक सतर्कता अपनाउन महाशाखाले अनुरोधसमेत गरेको छ।