प्रधानमन्त्री कप एनभीए भलिबल : हेल्प नेपाल फाइनलनजिक

काठमाडौँ– हेल्प नेपाल सातौँ संस्करणको प्रधानमन्त्री कप एनभीए राष्ट्रिय भलिबल क्लब लिगको फाइनलनजिक पुगेको छ। 

त्रिपुरेश्वरस्थित राखेपको कभर्ड हलमा बिहीबार सम्पन्न खेलमा विभागीय टोली एपीएफलाई ३-२ को सेटमा पराजित गर्दै हेल्प नेपाल फाइनलनजिक पुगेको हो।

शुरूआती दुई सेट २५-२७ र १७-२५ जितेको हेल्प नेपालले त्यो लय जारी राख्न सकेन। त्यसपछिका दुई सेट हेल्प नेपालले २५-२१ र २५-२३ ले सेट गुमाएको थियो। तर, पाँचौँ सेट तथा निर्णायक सेट १४-१६ ले आफ्नो पक्षमा पार्दै महत्त्वपूर्ण दुई अंक हेल्प नेपालले बटुल्यो।

जितसँगै हेल्प नेपाल ५ खेलबाट १३ अंकसहित शीर्ष स्थानमा रहेको छ। पराजित एपीएफको भने समान खेलबाट ११ अंक रहेको छ। एपीएफ तेस्रो स्थानमा छ।