पानीले बीपी राजमार्गको काभ्रेपलान्चोक खण्डमा सबैभन्दा बढी क्षति पुगेको हो। नमोबुद्ध नगरपालिका–६ चौकीडाँडा क्षेत्रमा रोशी खोलाको बाढीले करिब १५० मिटर राजमार्ग बगाएको छ।

धमिलो पानीमा देख्नै सकिन्न। नदीको वेगमा अडिन मुस्किल पर्छ। पानीभित्रको चापले नसाहरू फुट्ने, कानको समस्या आउनेजस्ता स्वास्थ्य जोखिम छँदै छन्। तापनि अतिरिक्त सुविधाबिनै गोताखोरहरू निरन्तर खटिएका छन्।

हरिनगर, देवानगञ्ज, भोक्राहा, दुहबी, बर्जु गाउँपालिका तथा इटहरी उपमहानगरपालिका केही घर डुबानमा परेका छन्।

बाढीले खुर्काेट बसपार्क डुबेको छ। रामेछाप जाने खुर्कोटको पक्की पुल पनि बगेको छ। बाढीले गाउँबस्तीलाई बगरमा परिणत गरेको छ। धानबाली नष्ट भएको छ।

बाढीपहिरो प्रभावित क्षेत्रमा खोजी र उद्धारका लागि नौ हजार ९८३ सुरक्षाकर्मी परिचालन गरिएको छ।

सप्तकोशीमा जलसतह खतरा तहभन्दा ११.२६ मिटरभन्दा माथि पुगिसकेको छ। बढ्ने क्रममा रहेकाले सतर्कता अपनाउन अनुरोध गरिएको छ।

देशव्यापी रूपमा परेको अविरल वर्षापछि आएको बाढी, पहिरो तथा डुबानले जनजीवन अस्तव्यस्त बनाएको छ। काठमाडौँ उपत्यकामा ४८ जनासहित देशभर ८६ जनाले ज्यान गुमाएका छन्।

झ्याप्ले खेलामा पहिरोले पुरिएका दुई वटा सवारीसाधनबाट १४ जनाको शव निकालिएको छ।

अविरल वर्षापछिको बाढीपहिरो तथा डुबानलाई मध्यनजर गर्दै शिक्षा मन्त्रालयले तीन दिन विद्यालय बन्द गर्न सबै स्थानीय तहलाई अनुरोध गरेको छ। 

झ्याप्ले खेलामा पहिरोले पुरिएको बसबाट दुई जनाको शव निकालिएको धादिङ प्रहरीले जनाएको छ।

सूर्यविनायक राममन्दिर, टुरिजम मार्केट, हनुमानघाट, लिवालीका भित्री क्षेत्र, बाराहीस्थान, जगाती क्षेत्र रूपमा डुबानमा परेका छन्। विद्यालय, व्यापारिक केन्द्र र बस्ती डुबानमा पर्दा धनमालको क्षति भएको छ।

आपत्कालीन समन्वयात्मक बैठकले बिजुली, खानेपानी, टेलिफोनलगायत अत्यावश्यक सेवा तत्काल सञ्चालनको व्यवस्था मिलाउन सम्बन्धित मन्त्रालयलाई निर्देशन दिएको छ।

काठमाडौँ उपत्यका प्रहरी कार्यालयका अनुसार विपद्का घटनामा परी १७ जना बेपत्ता भएका छन् भने १७ जना घाइते छन्।

अविरल वर्षाका कारण झरेको पहिरोले पृथ्वीराजमार्गअन्तर्गत धुनीबेशी र चन्द्रागिरि नगरपालिकाको सीमास्थित झ्याप्ले खोलामा यात्रुवाहक बस पुरेको छ।

दुई दिनदेखिको अविरल वर्षाका कारण काठमाडौँ उपत्यकाका ३ जिल्लामा ३२ जनाको मृत्यु भएको छ भने देशभर ४१ जनाले ज्यान गुमाएका छन्। बाढीपहिरो र डुबानबाट ६३ स्थानमा यातायात पूर्णरूपमा अवरुद्ध भएको छ।

कुलेखानी जलविद्युत् आयोजनाको जलाशयका ढोका खोलिएपछि सिस्नेरी खोलामा जलसतह बढेसँगै सुरक्षित स्थानतर्फ जाने क्रममा बेपत्ता भएकामध्ये तीन विद्यार्थीको शव भेटिएको छ।

बाढी पूर्वानुमान शाखाका प्रमुख विनोद पराजुलीले तीन दिनदेखिको अविरल वर्षा शनिबार बेलुकादेखि मत्थर हुँदै जाने बताए।

पहिरोले दोलखाको बिगु गाउँपालिका–१ लामाबगरस्थित ४५६ मेगावाट क्षमताको माथिल्लो तामाकोशी जलविद्युत् आयोजनाको बाँध क्षेत्रका संरचना (हेडवर्क्स)मा क्षति पुर्‍याएको छ।

सशस्त्र प्रहरीका अनुसार बाढीपहिरो तथा डुबानमा परी उपत्यकामा २१ जना तथा उपत्यका बाहिर नौ जनाको मृत्यु भएको छ भने ११ जना बेपत्ता भएका छन्।

चितवन प्रशासनले वर्षाका कारण हुनसक्ने क्षतिलाई मध्यनजर गर्दै नारायणगढ–मुग्लिन–नागढुंगा सडकमा सवारीसाधन सञ्चालनमा रोक लगाएको छ।