पेट्रोलियमको मूल्यवृद्धिले कर्णालीमा खाद्यान्न ढुवानी रोकियो, गोदाममै थन्कियो चामल

सुर्खेत– खाद्य व्यवस्था तथा व्यापार कम्पनी लिमिटेड कर्णाली प्रादेशिक कार्यालय वीरेन्द्रनगरको गोदाममा अत्यावश्यक दैनिक उपभोग्य वस्तु भरिभराउ छ।

पेट्रोलियम पदार्थको मूल्यवृद्धि भएसँगै खाद्यान्न ढुवानीको जिम्मेवारी पाएका ढुवानीकर्ताले भाडा महँगो हुने भन्दै ढुवानी रोकेपछि खाद्यान्न प्रादेशिक कार्यालयमै थन्किएको छ।

पछिल्लो समय पेट्रोलियम पदार्थको मूल्यवृद्धिसँगै ढुवानी भाडा महँगो भएको कारण देखाई खाद्यान्न ढुवानी कार्य प्रभावित भइरहेको प्रादेशिक कार्यालय प्रमुख केशवराज बुढाले जानकारी दिएका छन्।

भाडाका सम्बन्धमा मूल्य समायोजन नभएको भन्दै ढुवानीको काम रोकिएको उनले बताए। सुर्खेतबाट कर्णालीका १० जिल्लामा खाद्यान्न ढुवानी हुँदै आएको छ।

हिमाली जिल्लामा चिसो मौसममा हिउँले बाटो अवरुद्ध हुने भएकाले यो समयमा पालिकासँग कम्पनीले सम्झौता गरेर खाद्यान्न ढुवानीको काम तीव्रताका साथ गर्नुपर्नेमा सो कार्य प्रभावित भएको छ। मूल्यवृद्धि भएसँगै त्यस क्षेत्रमा हालसम्म ३० प्रतिशत मात्र खाद्यान्न ढुवानी भएको छ।