पत्रकार विराट अनुपमको पुस्तक ‘पहिलो आमनिर्वाचन २०१५’ विमोचित

काठमाडौँ— पत्रकार एवं लेखक विराट अनुपमद्वारा लिखित ‘पहिलो आमनिर्वाचन २०१५’ पुस्तकको विमोचन गरिएको छ। मंगलबार राजधानीमा आयोजित एक कार्यक्रमका बीच विभिन्न सञ्चारमाध्यममा कार्यरत पत्रकारहरूले संयुक्त रूपमा पुस्तक विमोचन गरेका हुन्।

किताबबारे बोल्दै प्रकाशक बुकहिलका अध्यक्ष भूपेन्द्र खड्काले यो एक ऐतिहासिक राजनीतिकसंग्रह भएको बताए। कूटनीति र राजनीतिमा गहिरो चासो राख्ने अनुपमले छोटो समयमै महत्त्वपूर्ण दस्ताबेज तयार पारेको उनको भनाइ थियो।

त्यस्तै, शिलापत्र डटकमका सम्पादक योगेश ढकालले किताबमा पहिलो आमनिर्वाचनको विस्तृत तथ्यांकसहितका नवीन सूचना रहेको भन्दै अनुपमले पठनयोग्य पुस्तक तयार पारेको बताए। त्यसैगरी, लेखक तथा प्रा.डा. जगत नेपालले आफूले समेत थाहा नपाएका कतिपय नयाँ तथ्यांक किताबमा रहेकाले राजनीतिक विषयमा चासो राख्नेहरूका लागि यो उपयोगी पुस्तक भएको उल्लेख गरे।

लेखक अनुपमका अनुसार पहिलो आमनिर्वाचनका रोचक प्रसंगहरू किताबमा समावेश गरिएको छ। जसमा १०९ वटै निर्वाचन क्षेत्रको परिणाम, राजनीतिक दलका घोषणापत्र र तत्कालीन समयमा राष्ट्रिय–अन्तर्राष्ट्रिय सञ्चारमाध्यमले गरेका कभरेजलाई समेटिएको छ। साथै, नेपाली राजनीतिका ‘हेभिवेट’ नेताहरूको पराजय, बीपी कोइराला र राजा महेन्द्रबीचको दूरी तथा उम्मेदवार र मतदातासँगको प्रत्यक्ष संवादलाई पनि पुस्तकमा उतारिएको छ।

अनुपमले यसअघि डोरबहादुर विष्टको पुस्तक ‘रिपोर्ट फ्रम ल्हासा’लाई ‘ल्हासाको खबर’का रूपमा नेपालीमा अनुवाद गरिसकेका छन्।