वार्ताअघि युक्रेनका लागि फ्रान्सले राख्यो यस्तो शर्त

रुससँगको युद्ध अन्त्यका लागि युक्रेनले कुनै भूभाग हस्तान्तरण गर्नुपर्ने विषयमा हुने कुनै पनि वार्ताअघि युक्रेनका लागि ‘बलियो सुरक्षा ग्यारेन्टी’ सुनिश्चित हुनुपर्ने फ्रान्सले स्पष्ट अडान लिएको छ। राष्ट्रपति इमानुएल म्याक्रोनको टोलीले मंगलबार यस्तो धारणा सार्वजनिक गरेको हो।

युक्रेनी राष्ट्रपति भोलोदिमर जेलेन्स्कीले बर्लिनमा अमेरिकी दूत तथा युरोपेली नेताहरूसँग करिब चार वर्षदेखि जारी युद्ध अन्त्य गर्ने उद्देश्यले वार्ता गरेपछि म्याक्रोनका एक वरिष्ठ सल्लाहकारले युक्रेनी भूभागसम्बन्धी कुनै पनि छलफलमा प्रवेश गर्नुअघि युक्रेनका लागि बलियो सुरक्षा ग्यारेन्टी आवश्यक चाहिने बताए। स्रोतका अनुसार उनले भने, “ग्यारेन्टीको विषयमा केही प्रगति भएको छ। अमेरिकी समर्थनका रूपमा प्राप्त स्पष्टताका लागि धन्यवाद।”

बर्लिनमा सम्पन्न वार्ताले युक्रेनका लागि तयार पारिँदै आएको अमेरिकी योजनालाई थप आकार दिइरहेको छ। प्रारम्भिक रूपमा उक्त योजना रुसका लागि अत्यन्तै अनुकूल मानिएको थियो। तर किभ र युरोपेली साझेदारहरूले सुरक्षा ग्यारेन्टी तथा भूभागको संवेदनशील प्रश्नलाई समेट्दै त्यसमा संशोधन गराउने प्रयास गरिरहेका छन्।

ट्रम्पको दाबी: शान्ति सम्झौता नजिक
युक्रेनमा शीघ्र शान्ति स्थापना गर्ने बारम्बार प्रतिबद्धता जनाउँदै आएका अमेरिकी राष्ट्रपति डोनाल्ड ट्रम्पले सोमबार युद्ध अन्त्य गर्ने सम्झौता पहिलेभन्दा नजिक पुगेको दाबी गरेका छन्। ह्वाइट हाउसमा बोल्दै ट्रम्पले संयुक्त राज्य अमेरिकाले जर्मनी, इटाली, फ्रान्स, बेलायत, पोल्यान्ड, नर्वे, डेनमार्क, फिनल्यान्ड र नेदरल्यान्ड्स लगायत युरोपेली नेताहरूबाट समर्थन प्राप्त गरेको र द्वन्द्वको अन्त्य हेर्न चाहेको बताए।

“उनीहरू अहिले रुसका राष्ट्रपति पुटिनसँग धेरै कुराकानी गरेर नजिक भएका छन् र मलाई लाग्छ हामी पहिलेभन्दा अहिले नजिक छौँ। हामी धेरैको ज्यान बचाउन चाहन्छौँ,” ट्रम्पले भने। युक्रेनमा युद्धको समाधानका लागि वार्ता गर्न बर्लिनमा अमेरिका, युरोपेली र नेटो नेताहरू तथा जेलेन्स्कीबीच घन्टौँ लामो कूटनीतिक छलफलपछि ट्रम्पको यो टिप्पणी आएको हो।

युक्रेन–युरोपको अडान
सन् २०२२ मा शुरू भएको पूर्णस्तरीय रुसी आक्रमणविरुद्धको युक्रेनी प्रतिरक्षामा संयुक्त राज्य अमेरिका प्रमुख समर्थक रहँदै आएको भए पनि पछिल्लो समय राष्ट्रपति ट्रम्पको कीएभप्रति असन्तुष्टिका संकेत बढ्दै गएको देखिएको छ। 

राष्ट्रपति ट्रम्पले युक्रेनले रुसलाई केही भूभाग सुम्पिनुपर्ने अवस्था अपरिहार्य भएको अभिव्यक्ति दिएका छन्। ट्रम्पको यो धारणा रुससँग शान्ति स्थापना गर्ने अमेरिकी योजनाको एक हिस्सा मानिएको छ। तर, यस्तो सम्भावित परिणाम राष्ट्रपति जेलेन्स्कीका लागि पूर्णतः अस्वीकार्य रहेको युक्रेनी पक्षले स्पष्ट रूपमा जनाएको छ।

बर्लिन वार्ताका क्रममा युरोपेली नेताहरूले रुसले कुनै सम्भावित युद्ध अन्त्य सम्झौता उल्लंघन नगरोस् भन्ने उद्देश्यले अमेरिका समर्थित सुरक्षा ग्यारेन्टीको एक हिस्साका रूपमा अन्तर्राष्ट्रिय बल तैनाथ गर्ने प्रस्तावसमेत अघि सारेका छन्। अल जजिराका अनुसार युरोपेली नेताहरू युक्रेनका लागि कुनै पनि पश्चिमी सुरक्षा ग्यारेन्टीको लागि सहमत भएका छन्। 

यसअघि युक्रेनी राष्ट्रपतिले पश्चिमाहरूको सुरक्षा ग्यारेन्टी भएमा युक्रेन आफ्नो नेटो सदस्यताको महत्त्वाकांक्षा त्याग्न तयार रहेको संकेत गरेका थिए। रुसले युक्रेनका विभिन्न क्षेत्रहरू आफ्नो भएको दाबी गर्दै आएको छ, यद्यपि ती सबै भूभाग उसले पूर्ण रूपमा नियन्त्रणमा लिएको छैन।