६० प्रतिशतले बढ्यो अलैँची निर्यात, चिया घट्यो

भद्रपुर– चालु आर्थिक वर्षको मंसिर मसान्तसम्ममा अलैँचीको निर्यात ६०.१० प्रतिशतले बढेको छ। 

मेची भन्सार कार्यालयको तथ्यांकअनुसार उक्त अवधिमा ५ अर्ब ५३ करोड ३२ लाख रुपैयाँको २ हजार ६२२.१० मेट्रिक टन अलैँची निर्यात भएको हो। 

अघिल्लो आवको सोही अवधिमा ३ अर्ब ४५ करोड ६३ लाख रुपैयाँ बराबरको  अलैँची निर्यात भएको थियो। पूर्वी नाकाबाट चियाको निर्यात भने घटेको छ। 

उक्त अवधिमा १ अर्ब ८५ करोड ६२ लाख रुपैयाँ बराबरको चिया निर्यात भएको छ। अघिल्लो आवको सोही अवधिमा २ अर्ब ७० करोड ३९ लाख रुपैयाँ बराबरको चिया निर्यात भएको थियो। 

 कार्यालयको तथ्यांकअनुसार निर्यात हुने मुख्य वस्तुमा भेनीयर सिट १२९.९० प्रतिशत, छुर्पी ३२ प्रतिशत, सुठो ४८.७० प्रतिशत, काउली, ब्रोकाउली र बन्दागोपी ३६.१० र मुसुरो दाल ४८१ प्रतिशतले वृद्धि भएको छ। 

यसैगरी, प्लाउड ४६ प्रतिशत, अम्रिसो ३५.५० प्रतिशत र फलामे पाता निर्यातमा ९७.८० प्रतिशतले कमी आएको छ  । 

मेची भन्सारबाट चालु आवको पहिलो पाँच महिनामा १० अर्ब ७१ करोड ५४ लाख रुपैयाँ बराबरको मालवस्तु निर्यात भएको छ।