क्रान्स मोन्टानाको बारमा आगलागी हुँदा १०० भन्दा बढी घाइते

नयाँ वर्षको पूर्वसन्ध्यामा स्विट्जरल्यान्डको प्रसिद्ध स्की रिसोर्ट शहर क्रान्स मोन्टानास्थित एक भिडभाडयुक्त बारमा भीषण आगलागी भएको छ। 'ले कन्स्टेलेसन' नामक बारमा भएको आगलागीमा परी ठूलो संख्यामा हताहती भएको छ भने १०० भन्दा बढी घाइते भएका छन्।

दक्षिणपश्चिमी स्विट्जरल्यान्डको वालिस क्यान्टन प्रहरीले यस घटनालाई 'अत्यन्त गम्भीर' भन्दै उच्च सतर्कता अपनाउन आग्रह गरेको छ। प्रहरी प्रवक्ता गेटान लाथिओनका अनुसार स्थानीय समय अनुसार बिहान १:३० बजे बारमा ठूलो विस्फोटसँगै आगलागी शुरू भएको थियो। नयाँ वर्षको उत्सव मनाउन उक्त भवनमा १०० भन्दा बढी मानिस भेला भएका थिए।

क्षेत्रीय काउन्सिलर माथियास रेनार्डका अनुसार घाइतेहरूको संख्या अत्यधिक भएपछि स्थानीय स्वास्थ्य प्रणालीमा ठूलो दबाब परेको छ। "क्षेत्रीय अस्पतालका सघन उपचार कक्ष र अपरेटिङ थिएटरहरू द्रुत रूपमा पूर्ण क्षमतामा पुगेका छन्," उनले भने। पीडितहरूमध्ये धेरैको अवस्था चिन्ताजनक रहेको र त्यसमा विभिन्न देशका पर्यटकहरू समेत परेको अधिकारीहरूले बताएका छन्।

वालिस क्यान्टन प्रहरीका कमान्डर फ्रेडरिक गिस्लरले पत्रकार सम्मेलनमा भने, "हामी यो घटनाबाट स्तब्ध छौँ।" उनले घटनास्थलमा उद्धारका लागि हेलिकप्टर र एम्बुलेन्सहरूको ठूलो टोली परिचालन गरिएको जानकारी दिए।

प्रहरीले आगलागीको कारणबारे अनुसन्धान शुरू गरिसकेको छ। प्रारम्भिक रिपोर्टअनुसार कन्सर्टका क्रममा भवनभित्रै गरिएको आतिशबाजीका कारण आगो सल्किएको हुनसक्ने आशंका गरिएको छ। स्विस मिडियाले सार्वजनिक गरेका तस्वीर र भिडियोमा आगोको प्रभावमा परेको भवनबाट मानिस चिच्याउँदै सुरक्षित स्थानतर्फ भागिरहेको भयावह दृश्य देखिन्छ।

प्रवक्ता लाथिओनले उद्धार कार्य जारी रहेको र प्रभावित क्षेत्रलाई सर्वसाधारणका लागि पूर्ण रूपमा बन्द गरिएको बताएका छन्। उद्धार कार्यमा बाधा नपुगोस् भन्नका लागि क्रान्स मोन्टानामा 'नो–फ्लाई जोन'समेत लागू गरिएको छ।

अधिकारीहरूले पीडित परिवारको सहयोगका लागि विशेष हेल्पलाइन र स्वागत केन्द्र स्थापना गरेका छन्। साथै, चिकित्सा स्रोतहरूमा परेको चापलाई मध्यनजर गर्दै स्थानीय जनतालाई थप दुर्घटना हुन नदिन सावधानी अपनाउन आह्वान गरिएको छ।