बांग्लादेशमा एक महिना ‘अन अराइभल भिसा’ बन्द

बांग्लादेशले आगामी आम निर्वाचन तथा संवैधानिक जनमत संग्रहलाई मध्यनजर गर्दै आगमन भिसा सुविधा अस्थायी रूपमा निलम्बन गरेको छ। आगामी जनवरी १५ देखि फेब्रुअरी १५ सम्मका लागि यो व्यवस्था लागू गरिएको हो।

नेपाल र भुटान जस्ता छिमेकी मुलुकका नागरिकले बांग्लादेश प्रवेश गर्दा पाउँदै आएको ‘अन अराइभल’ भिसा सुविधा अब एक महिनाका लागि उपलब्ध हुने छैन। बांग्लादेश सरकारले यस निर्णयबारे सम्बन्धित देशका सरकारहरूलाई आधिकारिक रूपमा सूचित गरिसकेको छ।

बांग्लादेशका एक वरिष्ठ अधिकारीका अनुसार यो नियम आगमनमा भिसा सुविधा प्राप्त गर्ने सबै देशका नागरिकमा लागू हुनेछ। “आगामी राष्ट्रिय संसदीय निर्वाचनको सुरक्षा संवेदनशीलतालाई ध्यानमा राखेर यो कदम चालिएको हो,” उनले भने।

बांग्लादेशमा आगामी फेब्रुअरी १२ मा राष्ट्रिय संसदीय निर्वाचन र केही महत्त्वपूर्ण संवैधानिक सुधारका विषयमा जनमत संग्रह हुँदैछ। निर्वाचन अभियान जनवरी २२ देखि शुरू हुने र सो समयमा राजनीतिक दलहरूले देशभर र्‍याली गर्ने भएकाले सुरक्षा व्यवस्था कडा पारिएको छ।

सीमा क्षेत्रमा अवैध प्रवेश र सम्भावित हिंसा रोक्न सरकारले देशभर सेना तैनाथ गरेको छ। सेनाबाहेक अन्य सुरक्षा निकायलाई पनि उच्च सतर्क रहन निर्देशन दिइएको छ। निर्वाचन सम्पन्न नभएसम्म यी भिसा सेवा पुनः शुरू हुने सम्भावना नरहेको अधिकारीहरूले स्पष्ट पारेका छन्।