चागोस टापुहरू मौरिससलाई हस्तान्तरण गरेकोमा ट्रम्पद्वारा बेलायतको आलोचना

अमेरिकी राष्ट्रपति डोनाल्ड ट्रम्पले चागोस टापुहरू (डिएगो गार्सिया सहित)को सार्वभौमिकता मौरिससलाई हस्तान्तरण गर्ने बेलायतको निर्णयको कडा आलोचना गरेका छन्। ट्रुथ सोसलमा एक पोस्ट गर्दै उनले यसलाई 'ठूलो मूर्खता' र बेलायतको तर्फबाट 'पूर्ण कमजोरी' बताएका छन्।

ट्रम्पले यो मुद्दालाई आफ्नो ग्रीनल्यान्ड मिसनसँग जोड्दै बेलायतले पनि त्यस्तै गर्नुपर्ने बताए। ग्रीनल्यान्ड प्राप्त गर्नु अमेरिकी राष्ट्रिय सुरक्षाको लागि आवश्यक रहेको उनले बताउँदै आएका छन्।

डिएगो गार्सिया जस्तो प्रमुख सैन्य अड्डा मौरिसस जस्तो देशलाई हस्तान्तरण गर्नु रणनीतिक रूपमा आत्मघाती रहेको उनको भनाइ छ। उनले व्यंग्यात्मक रूपमा बेलायतलाई 'अद्भुत नेटो सहयोगी' भन्दै यस कदमले चीन र रूस जस्ता देशहरूलाई यस क्षेत्रमा आफ्नो प्रभाव विस्तार गर्न अनुमति दिने उल्लेख गरे।

ट्रम्पका अनुसार, पश्चिमी देशहरूले बिना कारण महत्त्वपूर्ण भूमि त्यागिरहेका छन्, जसले विश्वव्यापी सुरक्षामा खतरा निम्त्याउँछ।

बेलायत र मौरिससबीचको सम्झौता अनुसार, चागोस टापुहरूमा मौरिससको नियन्त्रण हुनेछ, तर डिएगो गार्सियामा रहेको अमेरिकी–ब्रिटिश सैन्य अड्डा अर्को ९९ वर्षसम्म बेलायती नियन्त्रणमा रहनेछ। यद्यपि, डोनाल्ड ट्रम्प यो 'लीज' व्यवस्थाबाट सन्तुष्ट छैनन्।

चागोस द्वीपसमूहलाई पृथ्विमा सबैभन्दा स्वस्थ र कम प्रदूषित समुद्री पारिस्थितिक प्रणालीहरू मध्ये एक मानिन्छ। यो माल्दिभ्स द्वीपसमूहबाट लगभग ५०० किलोमिटर दक्षिणमा हिन्द महासागरमा ६० भन्दा बढी टापुहरू मिलेर बनेको छ।