अस्ट्रेलियाका विश्वविद्यालयमा कर्मचारीको मानसिक स्वास्थ्य जोखिम बढ्दै: अध्ययन

अस्ट्रेलियाका विश्वविद्यालयहरूमा कार्यरत कर्मचारीहरूको मानसिक स्वास्थ्य र मनोसामाजिक सुरक्षासम्बन्धी जोखिममा उल्लेखनीय वृद्धि भएको एक अध्ययनले देखाएको छ। अध्ययनअनुसार उच्च शिक्षा क्षेत्रका कर्मचारीहरूले अत्यधिक भावनात्मक थकान र मानसिक तनावको सामना गरिरहेका छन्।

अस्ट्रेलियन अनुसन्धान परिषद्को आर्थिक सहयोगमा गरिएको सर्वेक्षणअनुसार ८० प्रतिशतभन्दा बढी कर्मचारीले आफू अत्यधिक मानसिक थकानमा रहेको बताएका छन्। मूल्यांकन गरिएका ३६ वटै विश्वविद्यालयमा उच्च मनोसामाजिक जोखिम पाइएको छ, जुन सामान्य कार्यक्षेत्रको तुलनामा दोब्बरभन्दा बढी हो। विशेष गरी चार्ल्स डार्विन विश्वविद्यालय, न्यु साउथ वेल्स विश्वविद्यालय र क्विन्सल्यान्ड विश्वविद्यालयमा यस्तो जोखिमको स्तर सबैभन्दा उच्च रहेको देखिएको छ।

मुख्य अनुसन्धानकर्ताले कर्मचारीहरूको मानसिक स्वास्थ्य सुनिश्चित गर्न तत्काल प्रभावकारी कदम चाल्नुपर्ने आवश्यकता औँल्याएका छन्। अध्ययनले उत्पादनमुखी व्यवस्थापन प्रणालीको सट्टा कर्मचारीको कल्याणलाई प्राथमिकता दिने व्यवस्थापन पद्धति अपनाउन सुझाव दिएको छ।

अस्ट्रेलियाको कार्यस्थल स्वास्थ्य तथा सुरक्षासम्बन्धी कानूनअनुसार विश्वविद्यालयहरूले मनोसामाजिक जोखिमको रोकथाम र उचित व्यवस्थापन गर्न अनिवार्य जिम्मेवारी वहन गर्नुपर्ने हुन्छ। अध्ययनले कर्मचारीको मानसिक स्वास्थ्य र मनोसामाजिक सुरक्षाका लागि विश्वविद्यालय स्तरमा नीतिगत तथा व्यवस्थापकीय सुधार गर्दै सुरक्षित कार्यस्थल निर्माणमा जोड दिएको छ।