इरान-अमेरिका तनावले अन्तर्राष्ट्रिय बजारमा बढायो तेलको मूल्य

इरान–अमेरिका तनाव बढ्दा अन्तर्राष्ट्रिय तेल बजारमा मूल्य वृद्धि भएको छ। इरानको परमाणु कार्यक्रमलाई लिएर अमेरिकी राष्ट्रपति डोनाल्ड ट्रम्पको पछिल्लो टिप्पणी र चेतावनीपछि विश्व बजारमा तेलको मूल्यमा वृद्धि भएको हो।

पश्चिम टेक्सास इन्टरमिडियेट तेलको मूल्य प्रतिब्यारेल १.५ प्रतिशतले बढेर ६३.८० डलर पुगेको छ भने ‘अन्तर्राष्ट्रिय मानक ब्रेन्ट नर्थ सी क्रुड’को मूल्यमा पनि सामान्य वृद्धि देखिएको छ।

यतिबेला जेनेभामा इरान र अमेरिकाबीच इरानको परमाणु कार्यक्रमसम्बन्धी नयाँ चरणको वार्ता भइरहेको छ। विश्लेषक आरिन चिएक्रेका अनुसार दुवै देशले वार्ता शुरू गरे पनि अमेरिकी राष्ट्रपति डोनाल्ड ट्रम्पले तेहरानलाई सम्झौता गर्न असफल भएमा गम्भीर परिणाम भोग्नुपर्ने चेतावनी दिएका छन्। अर्कोतर्फ, इरानले भने अमेरिकी प्रतिबन्धहरूको पूर्ण अन्त्य नै कुनै पनि परमाणु सम्झौताको अनिवार्य सर्त रहेको स्पष्ट पारेको छ।

बजारका अन्य सूचकहरूमा युरोपेली सेयर बजार प्रारम्भिक कारोबारमा स्थिर देखिएको छ। टोकियो र चीनका बजारहरू चाडपर्वका कारण बन्द रहे भने वाल स्ट्रिट अमेरिकी सार्वजनिक बिदापछि मंगलबार पुनः खुल्दै छ। 

बेलायतमा बेरोजगारी दर पछिल्लो पाँच वर्षकै उच्च स्तर (५.२ प्रतिशत) मा पुगेपछि ब्रिटिस पाउन्डको तुलनामा अमेरिकी डलर बलियो भएको छ। यसले गर्दा बेलायतको केन्द्रीय बैंकले आगामी महिनामा ब्याजदर घटाउन सक्ने सम्भावना बढेको छ।

युरोपको सबैभन्दा ठूलो अर्थतन्त्र जर्मनीलाई सन् २०२६ मा आर्थिक वृद्धि हासिल गर्न चुनौती देखिएको छ। भूराजनीतिक असुरक्षा, बढ्दो लागत र कमजोर आन्तरिक मागका कारण आर्थिक वृद्धि रोकिन सक्ने जर्मनीको उद्योग तथा वाणिज्य चेम्बरले जनाएको छ।