बाढीले फेरि बगायो कमला नदीको डाइभर्सन, हुलाकी राजमार्ग अवरुद्ध

सिरहा– निरन्तरको वर्षासँगै आएको बाढीले सिरहा र धनुषा जोड्ने कमला नदीमा बनाइएको अस्थायी डाइभर्सन बगाएको छ। हुलाकी राजमार्गअन्तर्गत निर्माणाधीन पुलको विकल्पमा तयार गरिएको उक्त डाइभर्सन शनिबार बिहानको बाढीले बगाएको हो।

बिहीबार रातिदेखिको भारी वर्षाका कारण पुनः क्षति पुगेपछि हाल सयौँ सवारीसाधन र यात्रुहरू बीच बाटोमै रोकिएका छन्। केही दिनअघि पनि वर्षाले क्षति पुऱ्याएपछि मर्मत गरी डाइभर्सन सञ्चालनमा ल्याइएको थियो।

सहायक प्रमुख जिल्ला अधिकारी चेतराज बरालका अनुसार नदीमा पानीको बहाव उच्च रहेकाले हाल मर्मत गर्ने अवस्था छैन। "पश्चिमपट्टि पानीको बहाव धेरै छ। पानीको सतह घटेपछि नगरपालिकाको जेसीबी प्रयोग गरी बाँध निर्माणको काम अघि बढाइनेछ," उनले भने।

कमला नदीमाथिको पुल निर्माणमा भएको चरम ढिलाइले स्थानीयवासीले वर्षौंदेखि सास्ती खेप्दै आएका छन्। पुल निर्माण नहुँदा बर्खायाममा ज्यान जोखिममा राखेर डुंगा चढ्नुपर्ने वा घण्टौँ घुमेर पूर्व–पश्चिम राजमार्गको प्रयोग गर्नुपर्ने बाध्यता छ।