ट्रम्पको चीन भ्रमणअघि इरानी र चिनियाँ विदेशमन्त्रीहरूबीच बेइजिङमा भेट

चिनियाँ विदेशमन्त्री याङ वेईले बुधबार बेइजिङमा इरानी विदेशमन्त्री अब्बास अराघचीसँग वार्ता गरेका छन्।

चीनको समाचार एजेन्सी सिन्ह्वाले यो जानकारी दिएको हो, तर कुन विषयमा कुराकानी भयो भन्नेबारे बताइएको छैन।

यसअघि इरानको फार्स समाचार एजेन्सीले अराघचीले वाङसँग द्विपक्षीय सम्बन्ध र क्षेत्रीय तथा अन्तर्राष्ट्रिय विकासबारे छलफल गर्ने जनाएको थियो। अराघचीको भ्रमण अमेरिकी राष्ट्रपति डोनाल्ड ट्रम्पको अर्को हप्ता हुने चीन भ्रमणभन्दा अगाडि भएको हो, जहाँ उनले चिनियाँ राष्ट्रपति सी जिनपिङसँग भेट गर्नेछन्।

अमेरिका र इजरायलले इरानमाथि आक्रमण शुरू गरेपछि ट्रम्पले आफ्नो चीन भ्रमण स्थगित गरेका थिए। इरानी समाचार एजेन्सी तस्निम र फार्सका अनुसार विदेशमन्त्री अब्बास अराघची बुधबार बिहान कूटनीतिक प्रतिनिधिमण्डलसहित चिनियाँ राजधानी बेइजिङ पुगेका हुन्।​​​​​​​​​​​​​​​​​​​​​​​​​​​​

एसोसिएटेड प्रेस (एपी)का अनुसार अमेरिका र इजरायलले इरान विरुद्ध युद्ध शुरू गरेपछि इरानी विदेशमन्त्रीको यो पहिलो चीन भ्रमण हो।

चीन इरानको सबैभन्दा महत्त्वपूर्ण व्यापारिक साझेदार र इरानी तेलको प्रमुख खरिदकर्ता हो। इरानमाथि अमेरिकी प्रतिबन्धका बाबजुद पनि यसले इरानी तेल खरिद गर्न जारी राखेको छ।

अमेरिकी राष्ट्रपति डोनाल्ड ट्रम्पले मे १४ र १५ मा चिनियाँ राष्ट्रपति सी जिनपिङलाई भेट्न चीनको भ्रमण गर्ने कार्यक्रम रहेकै बेला अराघचीको भ्रमण भएको हो।

अमेरिकी विदेशमन्त्री मार्को रुबियोले इरानलाई होर्मुज जलडमरूमाथिको नियन्त्रण त्याग्न बाध्य पार्न अराघचीलाई दबाब दिन चीनलाई आग्रह गरेका छन्।

मंगलबार पत्रकारहरूसँग कुरा गर्दै मार्को रुबियोले भनेका थिए, "मलाई आशा छ कि चिनियाँहरूले इराकलाई के भन्न आवश्यक छ त्यो भन्नेछन्। अर्थात्, तपाईंले होर्मुजको जलडमरूमा जे गरिरहनुभएको छ त्यसले तपाईंलाई अन्तर्राष्ट्रिय रूपमा अलग गरिरहेको छ।"