भेनेजुएला भूकम्प: मृतकको संख्या १,४०० नाघ्यो, ५० हजारभन्दा बढी बेपत्ता

शक्तिशाली भूकम्प गएको तीन दिनभन्दा बढी समय बितिसक्दा पनि उद्धारकर्मीहरूले शनिबार भग्नावशेषमा बाँचेकाहरूको खोजी गर्न दौडधुप गरिरहेका छन्।

शनिबार राति एक ११ वर्षीय बालकलाई सकुशल उद्धार गरिएको छ। आइतबार यो समाचार तयार पार्दासम्म मृतक संख्या एक हजार ४३० पुगेको पुष्टि भएको छ। समय बित्दै जाँदा भग्नावशेषमा पुरिएका व्यक्तिहरूलाई जीवित अवस्थामा भेट्ने सम्भावना क्षीण बन्दै गएको छ।

भूकम्पका कारण हजारौँ मानिस बेपत्ता भएका छन् भने ठूलो संख्यामा घाइते भएका रिपोर्टहरू प्राप्त भएका छन्।

पहिल्यै आर्थिक संकट र राजनीतिक अस्थिरताबाट गुज्रिरहेको भेनेजुएलामा भूकम्पको क्षतिका कारण थप संकट आएको छ। जनवरीमा अमेरिकी विशेष बलले तत्कालीन नेता निकोलस मादुरोलाई पक्राउ गरेको थियो। लाखौँ मानिसलाई सरसफाइ र अन्य आधारभूत आवश्यकताहरूको अभाव हुने डर बढेको छ।

विशेषज्ञहरूका अनुसार प्राकृतिक विपत्तिपछि पहिलो ७२ घण्टा बाँचेकाहरू फेला पार्ने महत्त्वपूर्ण समय हो। त्यसपछि खोजी कार्य शव निकाल्ने प्रक्रियामा परिणत हुन्छ।

नाम दिन नचाहने एक साल्भाडोरका उद्धारकर्मीले भने, “यो अवस्थामा उनीहरू जीवित पाउने सम्भावना कम रहन्छ। भगवानको कृपाले केही जीवित मानिसहरू फेला परेमा यो ठूलो चमत्कार हुनेछ।”

देशको उत्तरमा रहेको काराबालेडा सहरमा शनिबार साँझ भग्नावशेषबाट ११ वर्षीय बालकलाई उद्धार गरिएको अन्तरिम नेता डेल्सी रोड्रिगेजले बताएकी छन्। “भेनेजुएलाका लागि हरेक जीवन आशाको स्रोत हो,” उनले उद्धारको भिडियोसहित एक्स (ट्विटर) मा गरेको पोस्टमा लेखेकी छन्।

स्थानीय अधिकारीहरूको फितलो प्रतिक्रियाप्रति सार्वजनिक आक्रोश बढिरहेका बेला, अमेरिका समर्थित रोड्रिगेजले सहायताका लागि अन्य देशहरूलाई धन्यवाद दिइन्।

संयुक्त राज्य अमेरिकाले सिमोन बोलिभर अन्तर्राष्ट्रिय विमानस्थलको एउटा रनवे आंशिक रूपमा सञ्चालनमा रहेको र त्यहाँ सी–१७ अमेरिकी सैन्य विमानहरू अवतरण गर्न सक्ने बताएको छ। यसका साथै एउटा नौसेना जहाज पनि तटमा पुगिसकेको छ।

बुधबारका दुई भूकम्पमा भत्किएका भवनहरूबाट बाँचेका मानिसहरूको खोजीमा स्थानीय बासिन्दाहरूले मेसिनहरूको अभावमा हातले नै भग्नावशेष हटाउने प्रयास गरिरहेका छन्।

“यो अत्यन्तै अराजक, गर्मी र अव्यवस्थित छ,” मियामीबाट एक्लै ला गुआइरा आएका ४३ वर्षीय अस्ट्रेलियन अग्नि नियन्त्रक क्रेग डेमिलोनले भने, “आशा छ, अझै पनि धेरै मानिसहरू फेला पार्न सकिनेछ।”

संयुक्त राष्ट्रसंघका सहायता प्रमुख टम फ्लेचरले शुक्रबार एएफपीसँग भने, “अहिलेसम्मको अनुमान अनुसार ५० हजारभन्दा बढी मानिस बेपत्ता रहेका छन्।”