तराईमा हुस्सु, हिमाल–पहाडमा आंशिक बदली

काठमाडौँ– देशभर पश्चिमी वायुको आंशिक प्रभावका कारण मौसममा परिवर्तन भएको छ। जल तथा मौसम विज्ञान विभागका अनुसार दिउँसो तराई भूभागका अधिकांश स्थानमा हुस्सु लाग्नेछ।

कर्णाली र सुदूरपश्चिमसहित बाँकी पहाडी तथा हिमाली भूभागमा आंशिक बदली रहनेछ। कोशी, गण्डकी र कर्णालीका उच्च पहाडी तथा हिमाली भूभागमा हल्का वर्षा तथा हिमपातको सम्भावना रहेको विभागले जनाएको छ। 

हुस्सु र कुहिरोका कारण तराई क्षेत्रमा हवाई तथा स्थल यातायात प्रभावित हुन सक्ने भएकाले आवश्यक सावधानी अपनाउन महाशाखाले आग्रह गरेको छ।

काठमाडौँ उपत्यकाको बुधबार बिहानको न्यूनतम तापक्रम ५ डिग्री सेल्सीयस रह्यो। अधिकतम तापक्रम १७ देखि १८ डिग्री सेल्सीयसका बीच रहने विभागको पूर्वानुमान छ।