बैंक लुटपाटमा संलग्न ७ जना पक्राउ

सिन्धुली– सिन्धुलीको घ्याङलेख गाउँपालिकामा रहेको नेपाल एसबीआई बैंकको शाखा लुटपाटमा संलग्न सात जनालाई प्रहरीले पक्राउ गरेको छ। घटनाबारे जिल्ला प्रहरी कार्यालयले शुक्रबार पत्रकार सम्मेलन गर्दै पक्राउ परेका व्यक्तिको विवरण सार्वजनिक गरेको हो।

जिल्ला प्रहरी कार्यालयका प्रहरी उपरीक्षक लालध्वज सुवेदीले पुस २९ गते साँझ ७:३० बजे बैंक लुटपाटमा संलग्न सात जना पक्राउ गरिएको र एक जना फरार रहेको जानकारी दिए।

उनका अनुसार काभ्रेपलाञ्चोकको बनेपा नगरपालिका–१० का ४९ वर्षीय सुमो चालक भागवतसिंह थापा, सिन्धुलीको घ्याङलेख गाउँपालिका–२ का ४७ वर्षीय चतुरमान बज्यु, चितवनको भरतपुर महानगरपालिका–२ का २४ वर्षीय शशांक श्रेष्ठ, नुवाकोटको पञ्चकन्या गाउँपालिका–५ का २३ वर्षीय मिलन गिरी, सोही ठेगाना भएका १९ वर्षीय विवेक मगर, सिन्धुलीको घ्याङलेख गाउँपालिका–२ का ४४ वर्षीय छविलाल स्याङ्तान र एक जना नाबालक पक्राउ परेका छन्।

पुस २९ गते साँझ उनीहरूले बैंकका गार्ड रुद्रबहादुर कार्की तथा कर्मचारीहरूलाई नियन्त्रणमा लिएर लुटपाट गरेका थिए। बैंकका सुरक्षा गार्डलाई खुकुरी प्रहार गरी सामान्य घाइते बनाउँदै बैंकभित्र पसेर नगद लुटी उनीहरू फरार भएका थिए।

घटनास्थलबाट करिब दुई किलोमिटर पूर्व लिपिखोलामा बा २ ज ०३९८ (वा सम्बन्धित नम्बर) टाटा सुमो र चालक भागवतसिंहलाई फेला पारी सोधपुछ गर्दा, अपरिचित ६ जनाले विवाहका लागि भन्दै उक्त सुमो बनेपाबाट रिजर्भ गरी ल्याएको खुलेको थियो। चालकले दिएको हुलियाका आधारमा खोजी तीव्र पारिएको थियो।

नेपाल एसबीआई बैंक घ्याङलेख शाखाका अनुसार उक्त दिन बैंकबाट तीन करोड सात लाख रुपैयाँ लुटिएको थियो। पक्राउ परेकाहरूलाई चोरी तथा डाँकासम्बन्धी कसुरमा पाँच दिनको म्याद थप गरी अनुसन्धान भइरहेको छ। 

प्रहरीले दुई करोड ६८ लाख ५५ हजार १७५ रुपैयाँ बरामद गरेको छ। साथै, उक्त घटनामा प्रयोग भएका दुई थान खुकुरी, एक थान प्लास्टिकको पेस्तोल, पाँच थान मोबाइल, एक थान ठूलो पानी टेप, तीन थान कालो नकाब, एक थान रातो नकाब र एक जोर कालो पञ्जा बरामद गरिएको छ।