आइकम नेपालमा नयाँ कार्यसमिति चयन

काठमाडौँ– अन्तर्राष्ट्रिय संग्रहालय परिषद् (आइकम)अन्तर्गतको राष्ट्रिय समिति ‘आइकम नेपाल’को नयाँ नेतृत्व चयन भएको छ। काठमाडौँमा सम्पन्न संस्थाको नवौँ वार्षिक साधारणसभाले रमेशप्रसाद दवाडीको अध्यक्षतामा ९ सदस्यीय नयाँ कार्यसमिति निर्वाचित गरेको हो। नवनिर्वाचित समितिको सचिवमा ओमप्रकाश घिमिरे र कोषाध्यक्षमा सन्तबहादुर गुरुङ चयन भएका छन्।

समितिको सदस्यहरूमा डा. पशुपति न्यौपाने, रोशन मिश्र, शान्ता चौधरी, पवित्रा थपलिया, सन्तोषकुमार सुवेदी र ख्यामप्रसाद शिवाकोटी रहेका छन्। आगामी तीनवर्षे कार्यकालका लागि जिम्मेवारी सम्हालेको समितिले नेपालको संग्रहालय क्षेत्रलाई थप व्यवस्थित र व्यावसायिक बनाउने लक्ष्य राखेको छ।

नवनिर्वाचित सचिव घिमिरेले आगामी दिनमा विशेषगरी स्थानीयस्तरमा सञ्चालनमा रहेका साना संग्रहालयलाई निश्चित मापदण्ड र मानकका आधारमा सक्षम बनाउन पहल गरिने जानकारी दिए। उनका अनुसार ती संग्रहालयहरूको भौतिक र प्राविधिक पक्ष सुधार्दै स्तरवृद्धि गर्नु समितिको मुख्य प्राथमिकता रहनेछ।

नेपालमा संग्रहालय क्षेत्रको विकास, ज्ञान निर्माण, नीतिगत पैरवी र क्षमता अभिवृद्धिमा क्रियाशील आइकम नेपालमा हाल १९ वटा संग्रहालय संस्थागत सदस्य र ५१ जना व्यक्तिगत सदस्य आबद्ध छन्। आइकमका विश्वभर १२० भन्दा बढी देशमा राष्ट्रिय समिति सक्रिय छन्।