रौतहटमा सवारी दुर्घटनामा २ जनाको मृत्यु

वीरगन्ज– रौतहटको दुर्गाभगवती गाउँपालिका–४ स्थित गौर–गंगापिपरा सडकखण्डको झाझपुल नजिकै मोटरसाइकल दुर्घटना हुँदा दुई जनाको मृत्यु भएको छ।

मृत्यु हुनेमा मोटरसाइकल चालक जितेन्द्र साह र मोटरसाइकल पछाडि पर्ने यमुनामाई गाउँपालिका–४ सरुअठा बस्ने २२ वर्षीय पुनमदेवी साह छन्। दुर्घटनामा गम्भीर घाइते भएका उनीहरूको उपचारका क्रममा  मृत्यु भएको रौतहट जिल्ला प्रहरी कार्यालयका सूचना अधिकारी विष्णुप्रदीप बस्यालले बताए।  

गंगापिपराबाट गौर आइरहेको बीआर३०यू१३७१ नम्बरको मोटरसाइकल अनियन्त्रित भएर सिसौको रुखमा ठोक्किएको प्रहरीले जनाएको छ। गम्भीर घाइते भएका दुवै जनालाई गौर प्रादेशिक अस्पताल उपचार गर्नका लागि पठाइएको थियो।