तामाकोशी बस दुर्घटना: बेपत्ता तीनमध्ये एकको शव फेला

रामेछाप– गत मंगलबार मन्थली नगरपालिका–६ स्थित तामाकोशी नदीमा भएको बस दुर्घटनामा परी बेपत्ता भएका तीन जनामध्ये एक जनाको शव सोमबार फेला परेको छ।

नेपाल प्रहरी र सशस्त्र प्रहरीको गोताखोर टोलीले खोजी गर्ने क्रममा मन्थली–२ पिप्लेका ९ वर्षीय क्रिचन तामाङको शव सुनकोसी नदीको खुर्कोट पुल नजिक फेला पारेको हो।

काठमाडौँबाट ओखलढुंगाका लागि छुटेको बाप्र. ०१–००५ ख ९९७५ नम्बरको अरनिको यातायातको बस त्रिवेणी पुल नजिकैबाट नदीमा खसेको थियो। उक्त दुर्घटनामा १२ जनाको घटनास्थलमै मृत्यु भएको थियो भने ८ जना घाइते भएका थिए। 

दुर्घटनामा बेपत्ता भएका लिखु तामाकोशी गाउँपालिका–७ का ८ वर्षीय रोनिश तामाङ र उमाकुण्ड गाउँपालिका–६ का २४ वर्षीय विशाल सुनुवारको अवस्था अझै अज्ञात छ। जिल्ला प्रहरी कार्यालय रामेछापका प्रमुख भोला भट्टले बेपत्ताको खोजी कार्य जारी रहेको जानकारी दिएका छन्।