धादिङ बस दुर्घटना: मृतक सबैको सनाखत

धादिङ– धादिङको बेनीघाट रोराङ गाउँपालिका–५, भैँसीगौडास्थित पृथ्वी लोकमार्गमा भएको बस दुर्घटनामा मृत्यु भएका १९ जनाकै सनाखत भएको छ। पोखराबाट काठमाडौँतर्फ आउँदै गरेको यात्रुबाहक बस सोमबार बिहान अनियन्त्रित भई सडकबाट करिब २०० मिटर तल त्रिशूली नदीको किनारमा खसेको थियो।

जिल्ला प्रहरी कार्यालय धादिङका प्रवक्ता एवं प्रहरी नायब उपरीक्षक प्रकाश दाहालका अनुसार, दुर्घटनामा ज्यान गुमाउनेहरूमा नेपालका विभिन्न जिल्लाका १६ जना र तीन जना विदेशी नागरिक रहेका छन्।

मृतकहरूमा कास्कीका ४० वर्षीय विवेक बस्तोला, २१ वर्षीया अञ्जली क्षेत्री, २१ वर्षीय रोहित नेपाली र २६ वर्षीय सुजित नेपाली रहेका छन्। तनहुँका पाँच जनाको ज्यान गएको छ, जसमा ४० वर्षीय ओमकुमार मल्ल, ५५ वर्षीया विष्णुमाया ढकाल, ४५ वर्षीय हरिप्रसाद सिग्देल, ६३ वर्षीय रुद्रप्रसाद ढकाल र २० वर्षीया अर्चना पौडेल रहेका छन्।

त्यसैगरी, काठमाडौँका ४२ वर्षीय लोप्साङ गोले र ३३ वर्षीया अनिशा महर्जन, स्याङ्जाका ६३ वर्षीय चन्द्रबहादुर कुँवर र ४५ वर्षीय घनश्याम सुवेदी, धादिङका ३० वर्षीय इन्जिनियर ठकुरी, पाल्पाका ५५ वर्षीय नविन्द्र श्रेष्ठ र मोरङकी २७ वर्षीया हीरा चौधरीको पनि यस दुर्घटनामा परी मृत्यु भएको छ।

यस घटनामा तीन जना विदेशी नागरिकले समेत ज्यान गुमाएका छन्। जसमा बेलायतका २४ वर्षीय स्टुअर्ट डोमिनिक एथान, भारत उत्तर प्रदेशका ३२ वर्षीय मनिष सुक्ला र चीनकी ४० वर्षीया झाङ चुनचुन रहेका छन्। प्रवक्ता दाहालका अनुसार मृतक सबैको शव आफन्तद्वारा पहिचान गरिसकिएको छ। प्रहरीले दुर्घटनाको कारणबारे थप अनुसन्धान गरिरहेको जनाएको छ।

यता, गृह मन्त्रालयले दुर्घटनाको सत्यतथ्य पत्ता लगाउन सहसचिवको संयोजकत्वमा पाँच सदस्यीय छानबिन कार्यदल गठन गरेको छ। मन्त्रालयका प्रवक्ता आनन्द काफ्लेका अनुसार कार्यदललाई दुर्घटनाको सम्बन्धमा विस्तृत छानबिन गरी शीघ्र प्रतिवेदन पेस गर्न भनिएको छ।

पृथ्वी राजमार्ग अन्तर्गत पोखराबाट काठमाडौँतर्फ आउँदै गरेको ग २ ख १४२१ नम्बरको यात्रुबस राति १:३० बजे धादिङको बेनीघाट रोराङ गाउँपालिका–५, भैँसीगौडास्थित त्रिशूली नदी किनारमा खसेर दुर्घटनाग्रस्त भएको थियो। दुर्घटनामा २५ जना घाइते भएका छन्। उनीहरूको काठमाडौँसहितका अस्पतालमा उपचार भइरहेको छ।