ऊर्जा संकटसँग जुध्न बांग्लादेशले माग्यो २ अर्ब डलर सहयोग

विश्वव्यापी ऊर्जा संकटले अर्थतन्त्रमा दबाब सिर्जना गरिरहेका बेला बांग्लादेशले तत्काल ऊर्जा आवश्यकताहरू पूरा गर्न अन्तर्राष्ट्रिय सहयोगको अपिल गरेको छ। प्रधानमन्त्री तारिक रहमानले विकास साझेदारहरूसँग करिब दुई अर्ब डलर बराबरको आपत्कालीन कोष माग गर्दै देशको आर्थिक स्थिरता जोगाउन सहयोग आवश्यक रहेको बताएका छन्।

एसिया शून्य उत्सर्जन समुदाय (एजेडइसी) प्लसको अनलाइन शिखर सम्मेलनमा उनले वर्तमान अवस्था गम्भीर रहेको उल्लेख गरे। “हाम्रो सामुन्नेको परिस्थिति तत्काल, एकताबद्ध र निर्णायक कदमको माग गर्छ,” उनले भने, “विशेष गरी कमजोर राष्ट्रहरूका लागि तत्काल सहयोग हाम्रो साझा प्राथमिकता हुनुपर्छ।”

ऊर्जा संकटले विश्वव्यापी रूपमा सिर्जना गरेको अस्थिरताले बांग्लादेशजस्ता विकासोन्मुख मुलुकहरूलाई बढी प्रभावित बनाएको उनको भनाइ थियो। उनले कुनै पनि देशले यस्तो चुनौती एक्लै सामना गर्न नसक्ने स्पष्ट पार्दै क्षेत्रीय तथा अन्तर्राष्ट्रिय सहकार्य अपरिहार्य भएको बताए।

प्रधानमन्त्री रहमानका अनुसार ऊर्जा अभावले बांग्लादेशको अर्थतन्त्रमा प्रत्यक्ष असर पारिसकेको छ। त्यसको सामना गर्न सरकारले अल्पकालीन उपायहरू लागू गरेको जानकारी दिँदै उनले माग व्यवस्थापन, इन्धन आपूर्ति सुनिश्चितता र खपत नियन्त्रणका नीति अपनाइएको उल्लेख गरे। सरकारी कार्यालय र बजार सञ्चालन समय सीमित गर्ने, आपत्कालीन इन्धन आयात बढाउने तथा स्रोत विविधीकरण गर्ने, साथै इन्धनको रासनिङ र खुद्रा बिक्रीमा सीमा निर्धारण गर्ने जस्ता कदम चालिएका छन्।

इन्धन सञ्चय र अनावश्यक खरिद रोक्न ‘फ्युल एप’ जस्ता डिजिटल पहलहरू पनि शुरू गरिएको उनले जानकारी दिए। यस्ता उपायले तत्काल प्रभाव कम गर्न मद्दत गरे पनि दीर्घकालीन समाधानका लागि अन्तर्राष्ट्रिय सहयोग अनिवार्य रहेकोमा उनको जोड थियो।

प्रधानमन्त्री रहमानले वर्तमान संकटलाई सन् १९७० को तेल संकटभन्दा पनि गम्भीर हुन सक्ने भन्दै चिन्ता व्यक्त गरे। उनका अनुसार त्यतिबेला देखिएको प्रभावले दशकौँसम्म विकास अवरुद्ध भएको थियो र अहिलेको परिस्थिति अझ जटिल बन्न सक्ने जोखिम छ।

सन् १९७१ मा स्वतन्त्रता प्राप्त गरेपछि बांग्लादेशले आर्थिक उन्नति गर्दै लाखौँ नागरिकलाई गरिबीबाट माथि उठाएको स्मरण गराउँदै उनले अहिले ती उपलब्धिहरू जोखिममा परेको चेतावनी दिए। “हामीले वर्षौंको प्रयासले हासिल गरेका उपलब्धिहरू उल्टिन सक्ने वास्तविक खतरा देखिएको छ,” उनले भने।

उनले बांग्लादेश मात्र नभई अन्य धेरै कमजोर देशहरू पनि यस्तै चुनौतीको सामना गरिरहेको उल्लेख गर्दै यसलाई विश्वव्यापी समस्याका रूपमा लिन आग्रह गरे। “यो केवल राष्ट्रिय प्रयासबाट समाधान हुने विषय होइन,” उनले भने, “यसका लागि समन्वित र प्रभावकारी अन्तर्राष्ट्रिय पहल आवश्यक छ।”

सम्मेलनमा जापानका प्रधानमन्त्री साने ताकाइची, मलेसियाका प्रधानमन्त्री अनवर इब्राहिमसहित एसियाका विभिन्न देशका सरकार प्रमुख तथा प्रतिनिधिहरूको सहभागिता थियो। कार्यक्रमको समापन गर्दै ताकाइचीले ऊर्जा संकट समाधानका लागि सहकार्य र दीर्घकालीन रणनीति आवश्यक रहेकोमा जोड दिएका थिए।