लाओसको गुफामा फसेका थप चार जनाको उद्धार

लाओसको एउटा गुफामा दश दिनदेखि फसेका थप चार जनाको उद्धार गरिएको उद्धारकर्ताहरूले बताएका छन्। उनीहरूलाई एक दिनअघि सतहमा ल्याइएको हो भने अझै दुई जना बेपत्ता रहेको बताइएको छ।

सतहको पानीलाई पम्प गरेर उनीहरूलाई बाहिर निकाल्न सक्षम भएको उद्धारकर्ताहरूले बताएका छन्।

‘थाइल्यान्ड रेस्क्यु डाइभर्स’ को फेसबुक पोस्टका अनुसार शनिबार दिउँसो करिब ३:१० बजे उद्धार अधिकारीहरू थप चार जनालाई बाहिर निकाल्न सफल भएका हुन्। हालसम्म पाँच जनाको उद्धार गरिएको छ भने दुई जना अझै बेपत्ता छन्।

गत मे २० देखि मध्य जाइसोमबुन प्रान्तको दुर्गम पहाडी क्षेत्रको गुफामा सुनको खोजी गर्ने क्रममा सात जना मानिसहरू आकस्मिक बाढीका कारण फसेको सरकारी सञ्चारमाध्यमहरूले रिपोर्ट गरेका छन्।

गुफाको सतहबाट करिब ३०० मिटर टाढाको साँघुरो स्थानमा ओत लागेका पाँच जनालाई बुधबार जीवितै फेला पारी उद्धार गरिएको थियो। उद्धारकर्ताहरूले शुक्रबार माटोले पुरिएका मानिसहरूलाई सुरक्षित स्थानमा सारेका छन्।

भारी वर्षाले आकस्मिक बाढी निम्त्याएपछि गुफाको निकास अवरुद्ध हुँदा उनीहरू गुफामै फसेका हुन्।