आर्थिक संकटबीच श्रीलंकाले ६ प्रतिशतले बढायो इन्धनको मूल्य

श्रीलंकाले आइतबार पेट्रोल र डिजेलको मूल्य करिब ६ प्रतिशतसम्म बढाएको छ। अन्तर्राष्ट्रिय मुद्रा कोष (आईएमएफ)को आर्थिक सुधार योजनाअनुसार इन्धनको लागतअनुसार मूल्य समायोजन गर्न र सरकारी अनुदान क्रमशः हटाउने उद्देश्यले यो निर्णय गरिएको हो।

राज्य सञ्चालित इन्धन कम्पनीका अनुसार पेट्रोलको मूल्य प्रतिलिटर ४१० रुपैयाँबाट बढेर ४३४ रुपैयाँ पुगेको छ। त्यस्तै, डिजेलको मूल्य प्रतिलिटर ३९२ रुपैयाँबाट बढेर ४०७ रुपैयाँ कायम गरिएको छ।

यो मूल्य वृद्धि आईएमएफले श्रीलंकालाई दिएको २.९ अर्ब डलरको राहत प्याकेजअन्तर्गत ६ करोड ९५ लाख डलर (६९.५ मिलियन)को अर्को किस्ता जारी गरेको केही दिनपछि भएको हो। सन् २०२३ को प्रारम्भमा शुरू भएको यो कार्यक्रमले आर्थिक संकटमा परेको देशलाई स्थिर बनाउने लक्ष्य राखेको छ।

आईएमएफले श्रीलंकालाई इन्धन र विद्युत् दुवै क्षेत्रमा लागतअनुसार मूल्य समायोजन गर्न दबाब दिँदै आएको छ। सरकारले पनि ऊर्जा क्षेत्रमा दिइँदै आएको अनुदान हटाउने प्रक्रिया अघि बढाउने बताएको छ।

राष्ट्रपति अनुरा कुमार दिसानायकेले आईएमएफलाई पठाएको पत्रमा सेप्टेम्बरसम्म इन्धन अनुदान पूर्ण रूपमा हटाइने उल्लेख गरेका छन्।

विश्लेषकहरूका अनुसार फेब्रुअरी २८ पछि मध्यपूर्वमा देखिएको तनावका कारण ऊर्जा आपूर्तिमा असर परेको छ, जसले श्रीलंकाको आयातमा निर्भर अर्थतन्त्रलाई थप दबाबमा पारेको छ।

श्रीलंकाले आफ्नो सम्पूर्ण इन्धन आयात गर्छ र विद्युत् उत्पादनका लागि कोइलामा पनि निर्भर छ। सन् २०२२ मध्ये देशले ४६ अर्ब डलर विदेशी ऋण तिर्न नसकेर आर्थिक 'डिफल्ट' गरेको थियो। त्यसयता आईएमएफको सहयोगमा अर्थतन्त्र स्थिर बनाउने प्रयास जारी छ।