भियतनामी भिक्षुद्वारा बौद्धनाथ, स्वयम्भूनाथ र चारुमती बिहारको शान्ति पदयात्रा

काठमाडौँ– शान्ति पदयात्राका क्रममा नेपाल आएका भियतनामी भिक्षुको समूहले विश्व सम्पदा सूचीमा सूचीकृत बौद्धनाथ, स्वयम्भूनाथ, चारुमती चैत्य एवं बिहारलगायत सम्पदाको अवलोकन गरेको छ।

पदयात्रामार्फत विश्वभरि शान्तिको सन्देश प्रसारण गरेपछि भिक्षु रत्नगुणाको समूह सोमबार बुद्धको जन्मभूमि नेपाल आएको हो। उनी भियतनामी थेराबाद बौद्ध सङ्घका संस्थापक एवं प्रथम सङ्घराज भन्ते वमसरखिता महाथेरोका एक मात्र जीवित शिष्य हुन्, साथै उनी भिक्षु पन्नाकाराका गुरु पनि हुन्। उनकै निर्देशनमा २४ जना भिक्षुले १०८ दिनसम्म अमेरिकाका विभिन्न राज्यमा गरी तीन हजार ७०० किलोमिटर शान्ति पदयात्रा गरेका थिए। यसको नेतृत्व भिक्षु पन्नाकारले गरेका थिए।

शान्ति अभियानअन्तर्गत नेपाल आएको यो टोलीमा भिक्षु पन्नाकारा र उनका गुरुलगायत छन्। यसका साथै अमेरिकाको तीन हजार ७०० किमी पदयात्रा पूरा गरेको चर्चित 'अलोका' नामको कुकुर पनि सँगै छ। उनीहरू थाइल्यान्डबाट दिल्ली हुँदै नेपाल आएका हुन्।

यो यात्राको उद्देश्य विश्व शान्ति, करुणा, अहिंसा र सजगताको सन्देशलाई व्यावहारिक रूपमा सबैका माझ पुर्‍याउनु हो। प्राविधिक पृष्ठभूमिबाट आएका यी भिक्षुले बौद्ध शिक्षालाई आधुनिक तथा सरल तरिकाले प्रस्तुत गर्ने गरेको जनाइएको छ। पदयात्राका क्रममा विभिन्न समुदायसँग संवाद गर्ने, ध्यान गराउने र ‘शान्ति बाहिर होइन, आफूभित्रबाट सुरु हुन्छ’ भन्ने सन्देश बाँड्ने कार्यक्रम रहेको छ। भारत, श्रीलङ्का र नेपालजस्ता देशमा पनि भ्रमणमार्फत उनीहरूले बौद्ध धर्मलाई मानवता र सहअस्तित्वका लागि प्रेरणाको स्रोत बनाउने गरेका छन्।

शान्ति भीडबाट प्राप्त हुँदैन भनेर बुद्धले आफैँभित्र खोजेजस्तै भिक्षुहरूले पनि शान्ति प्राप्तिका लागि कुनै महायज्ञ र अनुष्ठान नगरी अशान्तिका कारणहरू खोजेको जनाइएको छ। सिद्धार्थ गौतम बुद्ध भइसकेपछि पनि उनले कुनै विजययात्रा गरेनन्, बरु ज्ञान बाँड्नतिर लागे। यस्तै, यी भिक्षु पनि बुद्धको त्यही बाटो हिँड्दै यहाँ आइपुगेका हुन्।

दुःखको निवारण र शान्तिका लागि बिनाभेदभावको बाटो बुद्ध हिँडेको बाटो हो र यो बाटोको प्रारम्भ बिन्दु नेपाल हो भन्ने मान्यताका आधारमा उनीहरू नेपाल आएका हुन्। यसैगरी, संस्कृति, पर्यटन तथा नागरिक उड्डयनमन्त्री खडकराज पौडेलले शान्ति पदयात्रामा सहभागी भई आएका अलोका र भिक्षुको टोलीलाई काठमाडौँमा स्वागत गरेको मन्त्रालयको सामाजिक सञ्जालमा उल्लेख छ।

घाम, पानी, हिउँ र अनेकौँ कठिनाइबीच पनि भिक्षुहरूको साथ नछोड्ने अलोकाले करुणा, मैत्री, निष्ठा र सहअस्तित्वको अनुपम उदाहरण प्रस्तुत गरेको छ। अमेरिकामा भिक्षुहरूसँगै १०८ दिनसम्म तीन हजार ७०० किलोमिटरभन्दा बढी दूरी पार गर्दै शान्ति पदयात्रा अभियानमार्फत लाखौँ मानिसको मन जितेको ‘अलोका’ नामक कुकुर र भियतनामी भिक्षुको टोली सोमबार नेपाल आइपुगेको हो।

बुद्धको शिक्षाले भन्छ, ‘शान्ति बाहिरबाट आउँदैन, शान्ति हाम्रो मनबाट सुरु हुन्छ’। यस पदयात्राले त्यही सन्देशलाई अझ गहिरोसँग स्मरण गराएको छ। मानिस मात्र होइन, सबै प्राणीमा मैत्री र करुणा विस्तार गर्न सके मात्र साँचो शान्ति सम्भव छ।